Liv Galat
Chapit 5
Klike la pou koute lekti chapit sa1
Alèkile, se pou nou kanpe fèm nan libète ke Kris fè nou lib avèk li a, e pinga n al makònen tèt nou ak yon baboukèt esklavaj ankò.
2
Gade, mwen menm Pòl, mwen di nou, ke si nou fè yo sikonsi nou, Kris pa p gen okenn avantaj pou nou.
3
Konsa tou, m ap sètifye sa ankò pou tout òm ki sikonsi, ke li gen obligasyon pou obsève tout lalwa a nèt.
4
Kris vin san zefè pou nou; nenpòt nan nou k ap jistifye tèt li pa lalwa, alò, li soti anba lagras.
5
Paske, se akòz lafwa nou gen nan Bondye ak pa mwayen Lespri, ki fè n ap tann jistis.
6
Paske, nan Jezi Kris, ni sikonsizyon pa regle anyen, ni pa sikonsi nonplis, men, se lafwa k ap travay ak lanmou.
7
Nou t ap kouri trè byen, kilès ki bare wout nou pouke nou twouve pa obeyi laverite a?
8
Bagay sa a ki konvenk nou an, li pa soti kote Sila ki te fè apèl ban nou an.
9
Yon ti ledven gonfle tout pat la.
10
Mwen gen konfyans nan nou atravè Senyè a, ke nou p ap panse okenn lòt jan, men, moun sa k ap twouble nou an va sibi jijman l, nenpòt kilès li ye a.
11
Epi, mwen menm, frè yo, si m ap preche sikonsizyon, sa k fè m ap soufri pèsekisyon toujou?
12
Mwen ta menm swete ke moun k ap twouble nou yo al chatre tèt yo.
13
Paske, frè yo, se nan libète ke yo te rele nou; sèlman, pa itilize libète a kòm okazyon pou lachè, se pou nou youn sèvi lòt ak lanmou.
14
Paske, tout lalwa a akonpli nan yon sèl pawòl, se pawòl sa a menm: Nou va renmen pwochen nou tankou pwòp tèt nou.
15
Men, si nou youn nan mòde ak devore lòt, fè atansyon pou ke nou youn pa detwi lòt.
16
Alò, men sa m ap di: Mache nan Lespri a, e konsa nou p ap akonpli dezi lachè.
17
Paske, lachè gen dezi ki opoze a Lespri a, e Lespri a opoze a lachè; e, yo toude opoze youn ak lòt, dekwa pou nou pa ka fè bagay nou ta vle yo.
18
Men, si nou menm, se Lespri k ap kondui nou, konsa; nou pa sou lalwa.
19
Vrèmanvre, zèv lachè yo, yo klè, se yo menm sa: adiltè, fònikasyon, salte, debòch,
20
idolatri, maji, rayisman, debanday, jalouzi, kòlè, goumen, divizyon, entolerans, erezi,
21
anvi, asasinay, tafya, visye ak bagay ki parèy ak sa yo; mwen di nou sa davans, menm jan ke m te di nou nan tan pase yo, moun k ap fè bagay konsa yo p ap kapab eritye wayòm Bondye a.
22
Men, fwi Lespri a, se lanmou, lajwa, lapè, pasyans, byenveyans, bonte, lafwa,
23
dousè, tanperans; pa gen okenn lwa ki kont bagay sa yo.
24
E, moun ki nan Kris yo, yo krisifye lachè ansanm ak pasyon e dezi li yo.
25
Si n ap viv nan Lespri a, se pou nou mache nan Lespri a tou.
26
Se pa pou nou gen dezi laglwa ki san valè, jis pou youn ap fawouche lòt, e ke youn ap anvye lòt.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!