Liv Efezyen
Chapit 1
Klike la pou koute lekti chapit sa1
Pòl, yon apot Jezi Kris dapre volonte Bondye, a Sen yo ki nan Efèz, e a fidèl yo ki nan Jezi Kris.
2
Se pou nou gen gras ak lapè ki soti nan Bondye Papa nou an, ak nan Senyè nou an Jezi Kris.
3
Beniswa Bondye e Papa Senyè nou an Jezi Kris, ki te beni nou ak tout kalite benediksyon espirityèl nan espas yo ki nan syèl la, atravè Kris.
4
Difèt ke Li te chwazi nou nan Li anvan fondasyon monn lan, pouke nou te ka sen e san repwòch devan Li, nan lanmou.
5
Difèt ke Li te deside avni nou davans pou nou vin pitit adoptif Li atravè Jezi Kris, dapre bon plezi volonte Li,
6
pou lwanj glwa ki nan Li a, sa ki fè ke Li aksepte nou nan Byenneme a;
7
Li menm ke nou jwenn redanmsyon nan Li a, pa mwayen san L ki koule a; e, padon peche yo, dapre richès ki nan gras Li a.
8
Sa ki fè ke Li ban nou tout kalite sajès ak entelijans ann abondans,
9
pandan ke Li fè nou konprann mistè sa ki nan volonte Li a, dapre bon plezi pa Li, ke nan Li menm Li te deside ki pou rive,
10
pouke nan akonplisman lè tan an rive okonplè, Li kapab reyini tout bagay ansanm pou fè youn nan Kris; bagay sa ki nan syèl, e sa ki sou latè, nan Li menm.
11
Se nan Li menm tou ke nou twouve yon eritaj, difèt ke avni nou te deside davans, ann akò ak plan Sila a ki fè tout bagay mache dapre konsèy ki soti nan volonte pa Li,
12
dekwa pou nou ka sèvi kòm louwanj pou glwa Li, nou menm ki te mete konfyans nou nan Kris anvan an.
13
Se nan Li menm tou ke w te met konfyans ou, apre ke w te tande Pawòl verite a, levanjil ki sove w la; se nan Li menm tou, apre ke w te fin kwè a, ke yo te sele w nan pwomès la avèk Lespri Sen an.
14
Li menm ki se garanti eritaj ou a, jis rive nan redanmsyon sila ki pou Li yo, e ke Li peye pou yo a, pou lwanj glwa Li.
15
Se konsa ke mwen menm tou, aprè ke m fin tande pale de lafwa nou nan Senyè Jezi, epi de lanmou nou pou tout sen yo,
16
mwen pa sispann bay remèsiman pou nou, nan nonmen mwen nonmen non nou nan lapriyè mwen yo,
17
pouke Bondye Senyè Jezi Kris la, Papa a ki gen laglwa a, te ka ban nou lespri sajès la ak revelasyon pou nou konnen kilès Li ye.
18
E, lè je bonkonprann nou ta vin klere, pou nou ta vin konnen kisa ki esperans nan apèl Li a, epi, ki richès ki genyen nan laglwa eritaj Li a nan Sen yo.
19
Apre sa, ki grandè depase mezi ki genyen nan puisans Li anegad nou menm ki kwè a dapre konsekans fòs san limit Li an,
20
ke Li te fè travay nan Kris, lè Li te resisite L pami mò yo, epi Li te mete L chita sou men dwat Li nan espas yo ki nan syèl la;
21
pi wo lontan pase tout chèf, tout otorite, tout pouvwa souvren, ansanm ak tout non ki ka nonmen non sèlman nan monn sa a, men tou nan sila ki gen pou vini an.
22
Lèfini, Li mete tout bagay anba pye Li; epi Li ba Li pouvwa pou Li vin alatèt tout bagay, pou Legliz la,
23
ki se kò Li, e ki se totalite Sila a ki ranpli tout bagay okonplè nan tout moun.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!