Liv Efezyen
Chapit 4
Klike la pou koute lekti chapit sa1
Alò, mwen menm, prizonye Senyè a, mwen ankouraje pou nou mache yon jan ki konfòm ak vokasyon ke nou jwenn apèl pou li a,
2
ak tout imilite ak bonjan, e ak pasyans, pou ke youn sipòte pou lòt nan lanmou;
3
se pou nou fè tout efò pou nou kenbe inite Lespri a, avèk kòd ki mare nou nan lapè a.
4
Gen yon sèl kò, yon sèl Lespri, menm jan yo fè nou apèl nan yon sèl esperans pa mwayen vokasyon ke nou jwenn lan.
5
Yon sèl Senyè, yon sèl lafwa, yon sèl batèm,
6
yon sèl Bondye e Papa tout moun, ki sou tèt tout moun, aji nan tout moun, epi ki anndan nou tout.
7
Men, chak moun pami nou, gen gras li resevwa selon mezi ki nan kado Kris la.
8
Se sa k fè sa te ekri ke: Lè Li te monte rive anwo a, Li te mennen prizonye avèk Li, epi Li te distribye don bay lèzòm.
9
(Kounye a, difèt ke Li te monte a, kisa sa vle di si se pa ke anvan sa, Li te desann nan pati yo ki pi fon anba tè a?
10
Sila a ki te desann lan, se menm Li menm tou ki te monte anlè, pi wo pase tout syèl yo, dekwa pou ke Li kapab plen tout bagay okonplè.)
11
Epi, Li bay kèk kòm apot; e kèk kòm pwofèt; e kèk kòm evanjelis; ansuit kèk kòm pastè e anseyan,
12
pou pèfeksyònman Sen yo, pou travay ministè a, pou edifikasyon kò Kris la,
13
jiskaske nou rive nan inite ki nan lafwa a, e nan konesans Pitit Gason Bondye a, pou nou vin tounen yon moun ki okonplè, rive nan menm kalite wotè total Kris la,
14
pouke apati de jodi a, nou sispann tankou timoun ke yo voye anlè pasi pala, e ke nenpòt van doktrin bwote ale, avèk twonpri lèzòm ak mannigèt byen monte, kote ke yo ret kache ap tann pou pyeje moun.
15
Men pito, se pou nou di laverite nan lanmou, pou nou ka grandi vin tankou Li nan tout bagay, Li menm ki tèt la, anpalan de Kris.
16
Se pa mwayen Li menm ke tout kò a vin byen konekte ansanm, epi ke l rasanble fè yon sèl pa mwayen kontribisyon chak jwenti, dapre bonjan rezilta ki sot nan chak pati yo, sa ki lakòz ke kò a grandi pou edifye tèt pa li, nan lanmou.
17
Konsa donk, men sa ke m ap di, e ke mwen sètifye devan Senyè a: Sèke apati de jodi a nou pa mache tankou lòt Payen yo ap mache a, nan vanite lespri yo,
18
yo gen yon konesans ki nan fènwa, difèt ke yo separe de lavi Bondye a akòz inyorans lan ki lakay yo a, poutèt avèg kè yo avèg la.
19
Kòm yo se sansantiman, yo lage kò yo nan devègondaj, moun ki fin debòde pou yo fè tout kalite salte.
20
Men nou menm, se pa konsa nou te aprann konnen Kris;
21
si se tout bon vre ke nou te tande Li, e ke nou te aprann de Li, dapre verite ki nan Jezi a;
22
se pou nou debarase tèt nou de konduit nou te konn gen anvan an nan ansyen moun nou te ye a, ki te fin pouri ak move dezi yo k ap twonpe moun nan;
23
lèfini, se pou nou renouvle tèt nou nan lespri bonkonprann nou,
24
pouke nou abiye tèt nou ak nouvo moun nou ye a, ki te kreye dapre Bondye nan lajistis e vre devosyon pou Bondye.
25
Poutèt sa, se pou nou kanpe lwen bay manti, se pou chak òm pale laverite ak vwazen l, paske se manm youn ak lòt nou ye.
26
Si nou ta fè kòlè, se pa pou nou peche; pa kite solèy kouche sou movesan nou;
27
nonplis tou, pa bay dyab la okenn okazyon.
28
Se pou sila ki te konn vòlè a, sispann vòlè; men pito, se travay pou l travay; pouke ak men l, li va fè bagay ki bon; konsa, li va gen mwayen pou bay sila ki nan bezwen an kichoy.
29
Pa kite okenn mo sal soti nan bouch nou, men pito, pale sa ki bon e itil pou edifye, dekwa pou sa ka pote gras bay moun yo k ap tande a.
30
Lèfini, se pa pou nou fè Lespri Sen Bondye a gen lapenn; se nan Li menm ke so a poze sou nou pou rive nan jou redanmsyon an.
31
Se pou nou fè ansòt ke tout mechanste, ak fache, ak kòlè, ak pale fò, ak di move mo disparèt pami nou, ansanm ak tout kalite malfezans.
32
Epi, se pou nou gen jantiyès youn pou lòt, gen afeksyon, youn padonnen lòt, menm jan ke Bondye padonnen nou an poutèt Kris.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!