Liv Efezyen
Chapit 6
Klike la pou koute lekti chapit sa1
Timoun yo, se pou nou obeyi paran nou yo nan Senyè a, paske se yon bagay ki jis.
2
Onore papa w ak manman w, se premye kòmandman ki vini ak pwomès;
3
dekwa pou sa ka byen pou ou, epi pou w ka viv lontan sou latè.
4
E, nou menm papa yo, se pa pou nou pwovoke timoun nou yo jis pou rive nan kòlè, men pito, elve yo nan edikasyon ak koreksyon ki nan Senyè a.
5
Sèvitè yo, se pou nou obeyisan a moun ki mèt nou yo nan lachè a, ak krentif e latranblay, nan senserite kè nou, tankou se ak Kris.
6
Se pa sèlman devan je yo non, kòmsi se lèzòm n ap fè plezi, men pito, tankou sèvitè Kris k ap fè volonte Bondye ak tout kè yo.
7
Fè travay nou ak bònfwa, tankou se pou Senyè a e nonpa pou lèzòm.
8
Nou konnen ke nenpòt ki bon bagay yon moun fè, se menm sa ke li va resevwa nan men Senyè a, kit moun nan se esklav, kit li se moun lib.
9
Epi, nou menm mèt yo, se pou nou aji menm jan avèk yo; evite fè yo menas, puiske nou konnen ke Mèt pa nou an, e pa yo a tou nan syèl la, e ke pa gen okenn patipri avèk Li.
10
Lèfini frè m yo, pran kouraj nan Senyè a e nan pouvwa puisans Li.
11
Abiye tèt nou ak tout zam Bondye yo, dekwa pou nou kapab kanpe fèm kont mannigèt dyab la.
12
Paske, se pa kont chè ak san ke n ap konbat; men, se kont chèf, kont otorite, kont dirijan tenèb ki nan monn sa a, kont lespri mechan ki nan espas anwo yo.
13
Kidonk, se pou nou pran tout zam Bondye yo avèk nou, dekwa pou nou kapab reziste nan move jou a, apre ke nou fin fè tout sa ki pou pèmèt nou ret kanpe fèm.
14
Alò, kanpe fèm! Fòk nou gen ren nou mare ak laverite kòm sentiwon; epi, fòk nou met kiras jistis la devan lestomak nou;
15
e, fòk nan pye n, nou mete devouman pou levanjil lapè a.
16
E, plis pase tout bagay, fòk nou pran bouklye lafwa a, se avè l ke nou va kapab etenn tout flèch dife Mechan an.
17
Epi toujou, pran kas sali nanm nan, ak epe Lespri a, ki se Pawòl Bondye a.
18
An menm tan, toujou lapriyè tout kalite priyè ak siplikasyon nan Lespri a; epi, voye je sou sa san rete, avèk siplikasyon pou tout Sen yo.
19
Kanta pou mwen, lapriyè pouke pawòl fasil va vin nan bouch mwen, pou m ka louvri bouch mwen pale ak asirans pou m fè moun konnen mistè levanjil la.
20
Se pou li ke mwen se yon anbasadè nan prizon an; pouke ladan l, mwen kapab pale ak asirans, jan m sipoze pale a.
21
Lèfini, pou nou menm tou, nou konnen sa m ap regle, e kijan mwen ye; Tichik, yon frè byenneme e yon minis fidèl nan Senyè a, va mete nou okouran de tout bagay.
22
Se misye ke m voye kote nou pou sa menm, dekwa pou nou ka konnen sa n ap regle; e, pou li ka konsole kè nou.
23
Se pou lapè avèk frè yo, ansanm ak lanmou e lafwa ki soti nan Bondye Papa a ak nan Senyè Jezi Kris.
24
Se pou gras avèk tout sila yo ki renmen Senyè Jezi Kris ak yon lanmou ki sensè. Amèn
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!