Liv Filipyen
Chapit 2
Klike la pou koute lekti chapit sa1
Konsa donk, si gen nenpòt ki konsolasyon nan Kris, nenpòt ki rekonfò nan lanmou, nenpòt ki kominyon ak Lespri a, si gen santiman, ak mizerikòd,
2
se pou nou konplete lajwa mwen, anske nou panse menm jan, nou gen menm lanmou an, nou gen menm akò, menm lide.
3
Pa kite anyen fèt nan lespri divizyon, oswa pou glwa tèt nou, sa ki pa p sèvi anyen; men nan bese tèt, se pou chak moun konsidere lòt yo tankou yo siperyè a li menm.
4
Se pa pou chak moun plede ap okipe zafè pa l, men pou chak moun regle zafè lòt moun yo tou.
5
Kite lespri sa a rete nan nou, tankou ke l te nan Kris Jezi;
6
ki te nan fòm nati Bondye, men, ki pa t panse pou L pwofite difèt ke L egal ak Bondye a,
7
men pito, ki rabese tèt Li, epi ki pran fòm yon sèvitè, e, ki te vin fèt nan pòtre moun.
8
Epitou, ki twouve L tankou yon senp òm, Li rabese tèt Li, epi Li vin obeyisan jis pou rive nan lanmò, e, menm lanmò sou lakwa a.
9
Se poutèt sa tou, ke Bondye egzalte L, epi Li ba L yon non ki anlè tèt tout lòt non:
10
pouke, devan non Jezi, tout jenou va koube atè, kit sa ki nan syèl, kit sa ki sou latè, e kit sa ki anba tè;
11
e, ke tout lang dwe deklare ke Jezi se Senyè, pou glwa Bondye Papa a.
12
Konsa donk, byenneme frè mwen yo, tankou nou toujou obeyi a, nonpa nan prezans mwen sèlman, men kounye a, pi plis ke m pa la a, travay nan sali nanm nou ak krentif e latranblay.
13
Paske, se Bondye k ap travay nan nou, alafwa pou nou gen volonte a, e pou nou fè yo, dapre bon plezi pa Li.
14
Fè tout bagay san mimire, e san pale anpil
15
pouke nou ka san repwòch, moun ki pa ka fè mal, pitit Bondye, ki pa bezwen koreksyon, nan mitan jenerasyon kwochi e kowonpi sa a; nan mitan yo, nou klere tankou limyè nan lemonn.
16
Se pou nou kenbe Pawòl lavi a, dekwa pou nou ka rejwi nan Jou Kris la, pouke mwen pa t ni kouri pou anyen, ni travay pou anyen.
17
Wi, menmsi ke yo ta ofri m kòm sakrifis ak sèvis pou lafwa nou an, mwen gen lajwa, e mwen rejwi ak nou tout.
18
Se pou rezon sa a tou, pou nou gen lajwa e rejwi avèk mwen.
19
Men, mwen asire nan Senyè Jezi, pou m voye Timote ban nou nan yon ti moman, pouke m ka byen rekonfòte lè m vin konnen eta kijan nou ye.
20
Paske, mwen pa gen okenn moun ki ak menm santiman an, ki pou ta de pwòp tèt li, pran swen de sitiyasyon nou an.
21
Paske, yo tout ap regle zafè pa yo, se pa bagay Jezi Kris ki enterese yo.
22
Men, nou deja gen prèv de misye, ke se tankou yon pitit gason ak papa l, ke li te sèvi avè m nan levanjil la.
23
Se li menm alò, ke m ap voye, yonfwa m fin wè kouman bagay yo ap pase pou mwen.
24
Men, mwen asire nan Senyè a, ke mwen menm tou, mwen va vin talè konsa.
25
Epitou, mwen te jije l nesesè pou m te voye Epafwodit ban nou, ki se frè m, kamarad travay mwen, sòlda parèy mwen; mentou, ki se mesaje nou te voye kote m nan, pou sèvi m nan bezwen m yo.
26
Paske, li te anvi wè nou tout, e, li te gen kè sere difèt ke nou te tande ke l te malad la.
27
Tout bon vre, li te malad tou pre lanmò, men, Bondye te gen mizerikòd pou li; e, se pa pou li sèlman, men, pou mwen tou, pouke sa pa t rive ke m te gen lapenn sou lapenn.
28
Konsa donk, mwen te prese voye li, pouke, lè nou wè l ankò, nou kapab rejwi, e ke m ka mwen tris.
29
Alò, se pou nou resevwa l nan Senyè a, ak kè kontan, epi bay moun konsa onè.
30
Se poutèt zèv pou Kris ke li te pre lanmò a, li riske vi pa l, pou l founi sa ki te manke nan sèvis nou t ap rann mwen an.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!