Liv Filipyen
Chapit 4
Klike la pou koute lekti chapit sa1
Se poutèt sa, frè m yo, ke mwen renmen anpil yo, e ki chè a mwen yo, lajwa m, ak kouwòn mwen, se pou nou kanpe fèm nan Senyè a, chè byenneme m yo.
2
M ap egzòte Evodi, m ap egzòte Sentich, pou yo gen menm santiman nan Senyè a.
3
E, mwen priye w tou, vye kòlèg mwen, pou w ede medam sa yo ki te lite avè m pou levanjil la, ak Kleman tou, epi ak lòt kolaboratè m yo, ki gen non yo ekri nan Liv Lavi a.
4
Rejwi nan Senyè a san rete; yon lòt fwa ankò: Rejwi!
5
Se pou tout moun konn jantiyès nou; Senyè a nan pa pòt la.
6
Pinga nou gen tèt chaje pou anyen; men nan tout bagay, ak lapriyè, e siplikasyon avèk remèsiman, kite demann nou yo rive jwenn Bondye.
7
E, lapè Bondye , ki depase tout konpreyansyon, va kenbe kè nou ak lide nou, pa mwayen Kris Jezi.
8
Anfen, frè yo, nenpòt bagay ki verite, nenpòt bagay ki onèt, nenpòt bagay ki jis, nenpòt bagay ki sen, nenpòt bagay ki bèl, nenpòt bagay ki merite pou w apresye l; si gen ladwati ladan l, si gen lwanj ladan l, mete lide nou sou bagay sa yo.
9
Sa ke nou te resevwa, tande, e wè nan mwen yo, fè yo; e, Bondye lapè a va avèk nou.
10
Men, mwen te rejwi anpil nan Senyè a, dèske kounye a anfen, konpasyon nou te gen pou mwen an te rive fleri yon lòt fwa; nou te gen sa nan lide nou, men se okazyon an ki te manke nou.
11
Se pa poutèt bezwen mwen ke m ap di sa non, paske, mwen aprann, nan nenpòt ki eta mwen ye, pou m kontan.
12
Mwen konn jan pou m viv, kit lè sa pa bon, kit lè sa bon; tout kote, e nan tout bagay, mwen aprann pou m gen vant plen oswa pou m grangou; epitou, jwi nan abondans ak soufri nan nesesite.
13
Mwen ka fè tout bagay pa mwayen Kris ki fòtifye m.
14
Kanmenm, nou te byen fèt patisipe avè m nan soufrans mwen an.
15
Dayè, nou menm Filipyen, nou konn sa tou, ke nan kòmansman levanjil la, lè mwen pati kite Masedwàn, okenn legliz pa t kominike avèk mwen konsènan bay ak resevwa, men se te nou menm ase.
16
Paske, menm lè mwen te Tesalonik la, nou te voye yon fwa ak yon dezyèm fwa ankò, pou ede ak bezwen m.
17
Se pa paske m te anvi yon kado non; men, mwen te anvi yon fwi ki ka ogmante kont pa nou an.
18
Mwen resevwa tout bagay, e, mwen nan abondans, dèske mwen jwenn nan men Epafwodit bagay ke nou te voye yo; yon pafen bòn odè, yon sakrifis akseptab, ki fè Bondye plezi.
19
Mentou, Bondye m nan va founi nou tousa nou bezwen, dapre richès Li yo nan laglwa, pa mwayen Kris Jezi.
20
Kounye a, se pou Bondye, e Papa nou an, gen glwa pou toujou e pou tout tan. Amèn.
21
Salye chak Sen nan Kris Jezi. Frè yo ki avèk mwen yo voye salye nou.
22
Tout Sen yo voye salye nou, sitou sila yo ki nan kay Seza a.
23
Ke gras Senyè Jezi Kris la avèk nou tout. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!