Liv 2 Tesalonisyen
Chapit 2
Klike la pou koute lekti chapit sa1
Alèkile, n ap sipliye w, frè yo, pou sa ki gen pou wè ak retou Senyè nou an, Jezi Kris, ak reyinyon nou an ansanm avèk Li;
2
pou w pa kite yo boulvèse lòlòj ou fasil, oswa pou yo vire tèt ou, kit pa mwayen yon lespri, kit pa mwayen pawòl, nonplis tou pa mwayen kèk swadizan lèt ke nou ta voye, kòmkwa jou Kris la rive deja.
3
Pa kite pèsonn twonpe w ankenn jan; paske, jou sa a poko ap rive eksepte si genyen yon apostasi* ki rive anvan; epi, ke nonm peche a parèt aklè, pitit pèdisyon an;
4
li menm ki opoze l, e ki elve tèt li pi wo pase tout sa ke moun rele Bondye, oubyen ke moun adore; jis pou l twouve pran pòz Bondye l, e ke l al chita nan tanp Bondye a, lèfini li deklare tèt li Bondye.
5
Èske w pa sonje ke lè m te avè w la, mwen te di w bagay sa yo?
6
E, ou konnen kisa ki anpeche sa rive kounye a, pouke se kou lè li a rive l ap vin parèt aklè.
7
Paske, mistè rebelyon an gentan ap travay; sèlman, sila ki anpeche l kounye a, ap kontinye anpeche l, jiskaske li menm li wet kò l la.
8
Se lè sa a alò ke Mechan an va parèt; li menm ke Senyè a va kankannen ak souf bouch Li, e ke Li va detwi ak limyè klere retou Li a;
9
se nonm sa a menm nan, ki gen pou vini anba pouvwa Satan avèk tout kalite puisans, ak mirak, ak fo mèvèy,
10
e ak tout kalite twonpri ki pa dwat kay moun k ap peri yo, difèt ke yo pa t resevwa lanmou pou verite a, dekwa pou ke yo ta ka sove.
11
E se poutèt sa ke Bondye va voye yon fòs ki fè yo egare, pou yo ka kwè nan manti;
12
pou ke yo tout kondane, yo menm ki pa t kwè verite a, men ki t ap pran plezi yo nan enjistis.
13
Men, nou dwe rann Bondye gras san rete pou ou, frè yo, byenneme Senyè a, paske Bondye te gentan chwazi w depi okòmansman pou sali nanm ou atravè sanktifikasyon Lespri Sen an, ak kwayans nan verite a;
14
kote ke Li te aple w pa mwayen levanjil nou an, pou jwenn glwa Senyè nou an, Jezi Kris.
15
Kidonk, frè yo, kanpe fèm, epi kenbe tradisyon ke w te aprann yo, kit se te pa mwayen pawòl oswa pa mwayen lèt.
16
Konsa, se pou Jezi Kris, Senyè nou an Li menm, ak Bondye Papa nou ki te renmen nou e ki te ban nou, pa gras Li, yon konsolasyon etènèl ak bon jan esperans;
17
se pou yo ankouraje kè w, e tabli w fèm nan tout bon pawòl ak zèv.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!