Liv Ebre
Chapit 3
Klike la pou koute lekti chapit sa1
Se poutèt sa, frè sen yo, k ap patisipe nan apèl ki fèt nan syèl la, egzamine Apot e Sakrifikatè Souvren objè lafwa nou an, Kris Jezi;
2
ki te fidèl a Sila ki te ba L pozisyon an, menm jan Moyiz te fidèl nan tout bagay nan kay Li a.
3
Paske, Nonm sa a, te konsidere antan ke Li te merite plis glwa pase Moyiz, pa lefèt ke moun ki bati kay la, gen plis onè pase kay la.
4
Paske, tout kay bati pa yon moun kèlkonk, men Sila ki bati tout bagay la, se Bondye.
5
E, Moyiz, vrèmanvre, te fidèl nan tout kay Li a, tankou yon sèvitè, pou bay yon temwayaj sou bagay ki te gen pou te anonse apre yo.
6
Men, Kris, se antan ke Pitit Gason nan pwòp kay Li; e, kay Li a, se nou menm, si nou kenbe asirans lan, ak rejwisans lafwa a, fèm jiska lafen.
7
Konsa donk, tankou Lespri Sen an te di l la: Jodi a, si nou tande vwa Li,
8
pa fè rèd nan kè nou, tankou nan rebelyon an, nan jou tantasyon nan dezè a,
9
lè zansèt nou yo te tante Mwen an; yo te teste Mwen, e, yo te wè travay Mwen yo pandan karant an.
10
Poutèt sa, Mwen te fache kont jenerasyon sa a, e, M te di: Yo toujou ap fè erè nan kè yo; e, yo pa t janm konn chemen Mwen yo.
11
Donk, Mwen sèmante nan kòlè Mwen, yo pa gen dwa antre nan repo Mwen an.
12
Fè atansyon, frè yo, pouke sa pa rive ke ta gen nan nenpòt nan nou, yon kè ki nan maladi pa kwè a, jis pou nou ta ale kite Bondye Vivan an.
13
Men, se pou youn egzòte lòt chak jou; pandan ke sa posib pou di Jodi a; pou sa pa rive ke nenpòt nan nou ta fè rèd, poutèt li kite peche sedui l.
14
Vrèmanvre, nou vin moun k ap patisipe nan Kris, si nou kenbe kòmansman asirans nou an fèm, jiska lafen.
15
Pandan ke sa ap di a: Jodi a, si nou tande vwa Li, pa fè rèd nan kè nou, tankou nan rebelyon an.
16
Paske, kilès, lè yo te tande a, ki te fè rebèl la? Èske se pa t tout sa ki te soti nan peyi Lejip ak Moyiz yo?
17
Mentou, ak kilès Li te fache a pandan karant an an? Èske se pa t avèk sila ki te peche yo, ke kadav yo te tonbe nan dezè a?
18
Epi, bay kilès Li te sèmante ke yo pa gen dwa antre nan repo Li a? Èske se pa t moun ki pa t kwè yo?
19
Konsa, nou wè ke yo pa t ka antre anndan, akòz pa kwè yo pa t kwè a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!