Liv Ebre
Chapit 4
Klike la pou koute lekti chapit sa1
Donk, se pou nou gen krentif, pouke sa pa ta fèt, ke malgre yo kite yon pwomès pou nou antre nan repo Li a, nenpòt nan nou ta va rive rate l.
2
Paske, se ban nou ke levanjil la preche, menm jan sa te fèt pou yo menm tou a; men, pawòl ki te preche a pa t benefisye yo anyen; paske li pa t melanje ak lafwa, nan moun ki te tande l la.
3
Paske, nou menm ki te kwè yo, ap antre nan repo a; kòm Li di: Mwen sèmante nan kòlè M, yo pa p antre nan repo Mwen an. Alòske, travay yo te fini depi fondasyon lemonn.
4
Paske, gen yon kote Li te deklare, an palan de sistèm jou a, nan fason sa a: E, Bondye pran repo nan setyèm jou a, de tout travay Li.
5
Epi, nan kote sa a ankò: Yo pa gen dwa antre nan repo Mwen an.
6
Nou wè donk, ke sa rete posib pou kèk moun antre ladan l; e, sila ke pawòl la te preche ba yo anpremye a, pa t antre paske yo pa t kwè;
7
yon fwa ankò, Li fikse yon lòt jou lè Li te di nan David; ‘Jodi a’, apre ke tout tan sa a te fin pase, tankou sa te di: Jodi a, si nou tande vwa Li, pa fè rèd nan kè nou.
8
Paske, si Jozye te ba yo repo, alò, Li pa t ap pale de yon lòt jou.
9
Donk, rete yon repo pou pèp Bondye a.
10
Paske, moun ki antre nan repo Li a, li sispann travay pa l yo, tankou Bondye te sispann pa Li yo.
11
Annou lite donk, pou nou antre nan repo sa a, pouke sa pa ta rive, ke nenpòt moun ta tonbe pou l ta suiv menm egzanp pa kwè a.
12
Paske, Pawòl Bondye a vivan e li puisan, e, Li pi file pase nenpòt epe debò; Li pèse antre jis pou Li rive separe nanm ak lespri, e jwenti ak mwèl; epi, Li sonde lide ak entansyon kè moun;
13
ni pa gen okenn kreyati ki pa parèt aklè devan L; men, tout bagay dezabiye, e louvri devan je Sila nou gen pou nou rann kont ba Li a.
14
Kòm nou wè ke nou gen yon Sakrifikatè Souvren ki travèse syèl la, Jezi, Pitit Gason Bondye a, an nou kenbe objè lafwa nou an fèm.
15
Paske, nou pa gen yon Sakrifikatè Souvren ki pa kapab santi doulè feblès nou yo; okontrè, Li te tante tout jan, tankou sa ye pou nou an, men alò, san okenn peche.
16
Konsa donk, vini ak asirans devan twòn gras la, pou nou ka resevwa mizerikòd, e, pou nou twouve gras, pou ede nou, lè n gen bezwen.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!