Liv Ebre
Chapit 6
Klike la pou koute lekti chapit sa1
Donk, n ap kite prensip elemantè doktrin Kris yo dèyè, pou nou vanse nan pèfeksyon; san n pa nan poze fondasyon repantans ankò pou zèv ki san valè yo, e lafwa nan Bondye,
2
epi doktrin batèm, ak poze lamen, e rezireksyon mò, ak jijman etènèl.
3
E, n ap fè sa, si Bondye pèmèt.
4
Paske, li enposib, pou moun sa yo ki te resevwa limyè a, e ki te goute kado syèl la, e ke yo te fè patisipe nan Lespri Sen an,
5
e ki te goute bon Pawòl Bondye a, ak puisans Moun ki gen pou vini an,
6
si yo ta va tonbe lwen, pou yo ta kapab renouvle yo ankò pa mwayen repantans; difèt ke pou tèt pa yo, yo krisifye Pitit Gason Bondye a yon nouvèl fwa; epi, yo avili L an piblik.
7
Paske, latè k ap souse dlo lapli ki tonbe souvan sou li, e ke l pwodui yon zèb ki itil pou moun ki kiltive l la, li resevwa benediksyon Bondye.
8
Men, sa ki bay pikan ak pengwen an, yo rejte l, yo prèt pou modi l, e alafen, y ap boule l.
9
Men, byenneme, nou atann nou a pi bon bagay pou ou; e, bagay ki mache kòt a kòt ak sali nanm, malgre ke n ap pale konsa a.
10
Paske, Bondye pa enjis, pou Li ta bliye travay, ak zèv lanmou nou yo, ke nou te demontre annegad non Li, dèske nou te rann Sen yo sèvis, e, n ap rann yo sèvis toujou.
11
E, dezi nou, se pou chak nan nou ta montre menm mache prese sa a, pouke asirans nou genyen nan esperans lan, kapab plen jiska lafen;
12
pou nou pa vin lou, men pito, pou nou suiv moun ki, ak lafwa e pasyans yo, ap eritye pwomès yo.
13
Paske, lè Bondye te fè pwomès bay Abraram, difèt ke Li pa t ka sèmante sou pèsonn ki gen plis grandè pase L, Li te sèmante sou tèt Li.
14
Li te di: San mank, kanta beni, M ap beni w; kanta miltipliye, M ap miltipliye w.
15
E, konsa, apre ke l te sipòte avèk pasyans, li te rive jwenn pwomès yo.
16
Paske, lèzòm sèmante sou youn ki gen plis grandè pase yo; epi, sèman an, se yon garanti pou yo, ki met fen nan tout kont.
17
Se poutèt sa ke Bondye, ki te vle montre eritye pwomès yo avèk plis asirans, ke desizyon Li a te enchanjab, Li konfime l ak yon sèman.
18
Konsa, pa mwayen bagay ki pa kapab chanje, e, ke Bondye pa t ka bay manti ladan yo, nou genyen yon gwo konsolasyon; nou menm ki te kouri al pran refij nou, e ki met men nou sou esperans sa a ke yo te plase devan nou an.
19
Se esperans sa a nou genyen, tankou yon lank bato pou nanm, ki e asire, e fèm; epitou, ki antre jis anndan atravè vwal la;
20
kote premye Moun nan te antre pou nou an, Jezi Li menm, ki te fèt Sakrifikatè Souvren pou toutan, dapre tip òdonans Mèlkizedèk la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!