Liv Ebre
Chapit 8
Klike la pou koute lekti chapit sa1
Alèkile, men sa k pi enpòtan nan bagay sa ke nou pale de yo a: Kalite Sakrifikatè Souvren ke nou genyen an, Li chita sou men dwat twòn Majeste a ki nan syèl la;
2
se Li ki desèvis nan sanktyè a ansanm ak nan vre tabènak la, ke Senyè a te bati a; e nonpa yon moun.
3
Vrèmanvre, tout sakrifikatè yo gen kòm devwa pou ofri ofrann ak sakrifis; kidonk, li nesesè pou ke Moun sa a ta gen yon kichoy pou Li ofri tou.
4
Paske, si Li te sou latè, se pa prèt ke Li t ap ye, palefèt ke gen prèt ki ofri ofrann dapre lalwa a;
5
sa ki sèvi tankou egzanp ak lonbraj bagay sa yo ki nan syèl la; jan ke Moyiz te jwenn avètisman nan men Bondye, lè misye ta pral bati tabènak la; Paske, Li te di misye, se pou w veye ansòt ke w fè tout bagay dapre modèl ke yo te montre w sou mòn nan.
6
Kounye a atò, Li menm, Li resevwa yon ministè ki pi ekselan, dotan plis tou ke Li se Medyatè yon pi bon alyans ki chita sou yon kalite pwomès ki miyò.
7
Vrèmanvre, si premye alyans lan te san defo, alò, pa t ap gen kote pou al chèche yon dezyèm.
8
Se difèt ke Li jwenn fot nan yo ki fè Li te di: Senyè a di konsa: Gade non, jou yo ap vini, lè ke Mwen pral fè yon nouvo alyans avèk moun lakay Izrayèl ak moun lakay Jida yo.
9
Se p ap tankou alyans sa Mwen te fè ak zansèt yo a, nan tan lè ke Mwen te pran men yo pou Mwen kondui yo soti nan peyi Lejip la; paske, yo pa t kontinye nan alyans Mwen an, konsa tou, Mwen pa t okipe yo; se konsa Senyè a te pale.
10
Paske, men ki alyans ke Mwen pral fè ak moun lakay Izrayèl yo apre jou sa yo, Senyè a di konsa: M ap mete lalwa Mwen yo nan lespri yo, e M ap ekri yo nan kè yo; epi, se Mwen k ap Bondye pou yo, e y ap yon pèp pou Mwen.
11
Lèfini, p ap gen bezwen pou chak moun ta va aprann vwazen l, e pou chak moun ta va aprann frè l, pou ta di konsa: Se pou w konnen Senyè a! Paske, yo tout va konnen M; depi sou pi piti a rive sou pi gran an.
12
Paske M gen mizerikòd pou malfezans yo a; epi, peche yo ak inikite yo, Mwen pa p sonje yo ankò.
13
Lè Li di: yon nouvo alyans lan, se deklare Li deklare ke premye a ansyen; alòske, yon bagay ki ize, epi ki fin vye, li pre pou l diparèt.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!