Liv Ebre
Chapit 9
Klike la pou koute lekti chapit sa1
Avrèdi, premye alyans lan tou te genyen règ seremoni jan sèvis pou Bondye dwe fèt, ansanm avèk yon sanktyè sou latè.
2
Paske, te gen yon tabènak ki te bati, kote ke nan premye pati anndan l te gen chandelye a, ak tab la, epi ak pen sakre a, se sa ki rele Espas Sakre a.
3
Apre sa, dèyè dezyèm rido a, se te tabènak la, ki rele Espas Pi Sakre Pami Tout.
4
Se li ki te genyen yon ansanswa ann ò, ak lach alyans lan ki te kouvri nèt ak lò, e anndan l te gen yon po ann ò ki te gen lamàn ladan l, ak baton Arawon an ki te fleri a, epi ak tout tab alyans lan.
5
Ansuit, sou tèt li, te gen cheriben laglwa a yo ki te kouvri pwopisyatwa* a ak lonbraj yo, nou pa ka pale de sa kounye a.
6
Alò, lè bagay sa yo te vin fèt dapre lòd ki te bay yo, sakrifikatè yo te toujou antre nan premye pyès tabènak la pou yo fè sèvis pou Bondye.
7
Sepandan, nan dezyèm pyès la, se sakrifikatè anchèf la ki te antre ladan l pou kò l, yon fwa pa ane, nonpa san ke l pa pote san avèk li; ke li te ofri pou tèt pa l, ak pou tout peche pèp la.
8
Se konsa Lespri Sen t ap montre ke chemen pou antre anndan Espas Pi Sakre Pami Tout la, yo patko fè l parèt aklè, toutotan ke premye tabènak la te la toujou;
9
sa ki te yon siy pou tan kounye la a, kote ke yo te ofri e ofrann e sakrifis ki pa t kapab fè ke moun ki te bay sèvis la vin okonplè nan sa ki gen pou wè ak konsyans.
10
Bagay sa yo te kanpe sèlman sou manje ak bwason, avèk divès seremoni lavaj, ansanm ak de règleman pou lachè ke yo te enpoze sou moun yo jiskaske tan refòm nan rive.
11
Men Kris Li menm, Li vini antan ke Sakrifikatè anchèf pou bon bagay ki pral vini yo, pa mwayen yon tabènak ki pi gran e ki pi okonplè, ki pa t fèt alamen, ki vle di ki pa nan kreyasyon sa a;
12
nonplis tou, se pa avèk san bouk kabrit ak ti towo bèf, men se ak pwòp san pa Li ke Li te antre yon fwa pou tout anndan Espas Pi Sakre Pami Tout la, lè ke Li te vin posede redanpsyon etènèl pou nou.
13
Vrèmanvre, si san towo bèf ak bouk kabrit avèk sann yon gazèl, ke yo wouze sou moun ki sal moralman yo, epi sa twouve sanktifye e pirifye lachè.
14
Alò, èske se pa pi plis toujou ke san Kris, ki atravè Lespri Etènèl la, te ofri tèt Li san okenn tach bay Bondye, a va pije konsyans nou de zèv ki mouri yo, pou ke nou sèvi Bondye Vivan an?
15
E se pou rezon sa a ke Li se Medyatè Nouvo Testaman an, dekwa pou ke pa mwayen lanmò, pou redanpsyon vyolasyon yo ki te fèt sou premye testaman an, e se konsa sila ki Aple yo a va resevwa pwomès eritaj etènèl la.
16
Paske, kote k gen yon testaman, lanmò moun ki mèt testaman an ta dwe nesesè tou.
17
Vrèmanvre, yon testaman vin gen fòs apre ke moun nan mouri; apa de sa, li pa gen valè ditou pandan ke mèt testaman an vivan.
18
Se sa k fè ke premye testaman an nonplis tou pa t ratifye san ke pa t gen san.
19
Paske, lè Moyiz te fin deklare bay pèp la tout kòmandman yo dapre lalwa a, misye te pran san towo bèf ak bouk kabrit avèk dlo, epi ak lenn wouj epi izòp, li te wouze e liv la, e tout pèp la.
20
Li te deklare konsa: Sa a se san kontra ke Bondye pase lòd pou nou an!
21
Lèfini, li te wouze e tabènak la, e tout veso ki itilize pou ministè a avèk san.
22
E, dapre lalwa, se prèske tout bagay ki pirifye ak san; epi, si san pa koule, pa gen padon peche.
23
Li te nesesè konsa donk pou ke bagay sa ki te reprezante sa yo ki nan syèl la te pirifye konsa; alò, bagay sa yo ki nan syèl la menm, se avèk sakrifis ki pi miyò pase sa yo y ap pirifye.
24
Paske, Kris pa t antre nan espas sakre ki te bati alamen yo, sa ki se potre bagay tout bon vre yo, men pito, se te nan syèl la menm, kote ke kounye a, Li vin nan prezans Bondye pou nou.
25
Nonplis ke Li ta gen pou ofri tèt Li plizyè fwa tou, tankou sakrifikatè anchèf la ki te antre nan Espas Pi Sakre Pami Tout la chak ane, ak san ki pa san pa yo;
26
paske si se ta pou sa, Li t ap blije soufri plizyè fwa depi kreyasyon lemonn nan; alòske kounye a, se yon sèl fwa nan fen tan yo la a ke Li parèt pou aboli peche, pa mwayen sakrifye Li sakrifye tèt Li a.
27
E, jan sa ye a, se yon sèl fwa lèzòm gen randevou pou yo mouri, apre sa, se jijman an.
28
Kidonk, se te yon sèl fwa wi ke Kris te vini yon ofrann ki pou te pote chay peche anpil moun, e apre sa, pou sila yo ki chèche L yo, Li va parèt yon dezyèm fwa, san peche, pou sove yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!