Liv Ebre
Chapit 10
Klike la pou koute lekti chapit sa1
Paske, lalwa a gen nan li yon lonbraj de bon bagay ki genyen pou vini yo, men, se pa vre fòm bagay sa yo; lalwa pa janm kapab fè moun ki te vin fè ofrann yo rive alapèfeksyon konsa, avèk sakrifis sa yo ke moun yo te ofri ane apre ane san rete a.
2
Paske si se ta sa, èske yo pa t ap sispann sakrifis yo? Difèt ke moun k ap adore yo, yon fwa yo fin pirifye, pa t ap gen konsyans de peche yo ankò.
3
Men, nan sakrifis sa yo, gen yon souvni de peche ki rive ankò chak ane.
4
Paske, sa pa posib pou ke san towo bèf ak bouk kabrit ta kapab wete peche.
5
Ki fè ke lè Li vini nan lemonn, Li di konsa: Sakrifis ak ofrann, se pa sa ke Ou te vle, men, se te yon kò ke Ou prepare pou Mwen.
6
Nan olokos ak sakrifis pou peche, Ou pa t jwenn okenn plezi.
7
Lè sa a atò, Mwen deklare: Men li! M ap vini, (nan woulo Liv la, se de Mwen ke yo te ekri) pou ke Mwen fè volonte Ou, O Bondye.
8
Lè ke anvan an Li te di: Sakrifis ak ofrann, e olokos ak sakrifis pou peche yo, Ou pa t vle yo, nonplis tou, Ou pa t gen plezi nan yo, bagay konsa, se dapre lalwa ke yo ofri yo.
9
Apre sa, Li di: Men li! M ap vini pou Mwen fè volonte Ou, O Bondye. Konsa, Li met premye a sou kote, dekwa pou Li ka tabli dezyèm nan,
10
ki ak mwayen sa a ke nou sanktifye atravè sakrifis kò Jezi Kris, yon fwa pou tout.
11
E, alòske tout sakrifikatè kanpe chak jou ap fè sèvis ak bay ofrann, byen souvan ak menm sakrifis yo ki pa janm ka wete peche a;
12
men, Nonm sa a Li menm, apre ke Li te fin ofri yon sèl sakrifis pou peche pou toutan, Li chita sou men dwat Bondye.
13
Alèkile, L ap tann pou jiskaske lènmi L yo vin tounen machpye Li.
14
Paske, se pa mwayen yon sèl sakrifis la ke Li fè moun ki sanktifye yo rive nan pèfeksyon;
15
se konsa tou ke Lespri Sen an se yon Temwen pou nou, paske apa de sa, men sa Li te di toudabò:
16
Se kontra sa a ke M ap siyen avèk yo apre jou sa yo, se sa Senyè a te deklare; M ap mete lwa Mwen yo nan kè yo, lèfini, M ap ekri yo nan lide yo.
17
Apre sa, Mwen p ap sonje peche yo ak inikite yo ankò.
18
Kounye a atò, kote ki gen padon pou bagay sa yo, pa gen sakrifis pou peche ankò.
19
Kidonk, frè yo, difèt ke nou gen asirans pou nou antre nan Espas Pi Sen Pami Tout la pa mwayen san Jezi a,
20
nan yon wout ki e nèf, e bay lavi, ke Li te konsakre pou nou atravè vwal la, sa ki vle di, chè Li.
21
E, kòm nou gen yon Sakrifikatè anchèf sou tèt lakay Bondye a,
22
annou vanse pre ak yon kè sensè nan asirans total kapital lafwa a, pandan ke kè nou pirifye anba yon move konsyans, e ke kò nou lave ak dlo ki pwòp nèt.
23
Annou kenbe fèm ak deklarasyon ke n te fè de esperans nou genyen an san brannen; (paske, Sila a ki te fè pwomès la, Li fidèl!)
24
Lèfini, annou youn konsidere lòt pou aktive nan nou lanmou ak bòn zèv.
25
Pinga nou bandone asanble lè nou reyini ansanm yo, tankou jan kèk moun ap fè l la; men pito, annou youn egzòte lòt, e plis toujou lè nou wè jou a ap pwoche.
26
Paske, si nou fè espre pou nou peche, apre ke nou fin resevwa konesans verite a, pa rete okenn lòt sakrifis pou peche ankò,
27
men se va yon sòt de atant nan krentif pou jijman k ap avèk yon endiyasyon wouj kou dife, ki va devore advèsè yo.
28
Moun sa ki te vyole lalwa Moyiz la te mouri san okenn mizerikòd, sou depozisyon de oswa twa temwen.
29
Ki pi move kalite chatiman nou panse ke yon moun ta va merite si li ta pase Pitit Gason Bondye a anba pye l, e ke li ta konsidere san alyans lan, sa ke l te sanktifye avèk li a, tankou yon bagay ki enferyè; epi ke li ta fè yon derespektan ak Lespri lagras la?
30
Paske, nou konnen Sila ki te deklare konsa a: Vanjans, se pou Mwen sa ye. Se Mwen ki va bay moun monnen pyès yo; epi ankò: Senyè a va jije pèp Li a.
31
Se yon bagay terib wi pou w ta tonbe anba men Bondye Vivan an!
32
Men, se pou nou repase nan memwa nou premye jou sa yo, kote ke apre ke nou te fin gen je nou klere a, nou te andire yon gwo batay anba soufrans;
33
Yon bò, nou te tounen yon espektak anba e avilisman, e tribilasyon; yon lòt bò, nou te mache kòt a kòt ak moun ke yo t ap maltrete menm jan avèk nou yo.
34
Vrèmanvre, nou te gen kèsansib pou mwen nan chenn mwen yo, epi, se ak lajwa ke nou te pran lefèt ke yo te vòlè byen nou yo, poutèt ke nou konnen nan nou menm, ke nan syèl la, nou genyen byen k ap pi bon epi k ap dire.
35
Alò, pinga voye asirans nou an jete, gen gwo pri rekonpans ladan l.
36
Paske, nou bezwen pèseverans, dekwa pou ke lè nou fin fè volonte Bondye, nou va resevwa pwomès la.
37
Paske, nan yon ti tan tou kout ankò, epi, Sila ki va gen pou vini an ap vini, e, Li p ap mize.
38
Alèkile, moun ki jis lan va viv pa lafwa; men, si nenpòt ki moun fè bak, nanm Mwen p ap gen okenn plezi nan li
39
Men nou menm, nou pa pami moun ki fè bak tounen epi ki pèdi yo, men, pami sila ki kwè yo, pou rive nan sali nanm yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!