Liv Ebre
Chapit 11
Klike la pou koute lekti chapit sa1
Avredi, lafwa se reyalite bagay ke nou gen espwa pou yo a, se prèv bagay ke nou pa wè yo.
2
Anfèt, se pa mwayen li ke zansèt yo te resevwa yon bon temwayaj.
3
Se pa mwayen lafwa ke nou rekonèt ke monn yo te fòme ak Pawòl Bondye, kote ke bagay sa ke je ka wè yo pa t fèt ak bagay ki te vizib.
4
Se pa mwayen lafwa ke Abèl te ofri bay Bondye yon sakrifis ki ekselan pase pa Kayen an; sa ki te fè ke li te resevwa temwayaj ke li se yon nonm ki jis; Bondye te temwaye de ofrann misye yo; e, se lafwa a tou ki fè ke malgre misye te mouri, twouve ke li t ap pale toujou.
5
Se pa mwayen lafwa ke Enòk te transpòte ale, dekwa pou l pa t wè lanmò, e ke yo pa t ka jwenn li, paske Bondye te transpòtel. Vrèmanvre, anvan transpòtasyon misye a, li te resevwa temwayaj sa a: ke li te fè Bondye plezi.
6
Sepandan, san lafwa, li enposib pou moun fè Bondye plezi; paske, sila a k ap vin jwenn Bondye a dwe kwè ke Li egziste, e ke Li rekonpanse moun k ap chèche Li ak tout kè yo a.
7
Se pa mwayen lafwa ke Noye, lè li fin jwenn avètisman nan men Bondye de bagay ke moun patko janm wè, misye te vin anvayi ak krentif, epi li prepare yon lach pou li sove moun lakay li. Se konsa ke l kondane monn nan, epi ke li te vin eritye lajistis ke moun jwenn pa mwayen lafwa a.
8
Se pa mwayen lafwa ke Abraram, lè ke l te jwenn apèl pou li te ale nan yon kote ke l te va gen pou resevwa apre kòm eritaj, li te obeyi; lèfini, misye te pati ale, san l pa t menm konnen kote l t aprale.
9
Se pa mwayen lafwa ke misye te vin rete sou tè pwomès la, tankou nan yon peyi etranje, li te abite anba tant ansanm ak Izarak ak Jakòb, yo menm ki se eritye parèy li de menm pwomès la.
10
Paske misye t ap chèche yon vil ki gen fondasyon e ke achitèk ak kontremèt li se Bondye.
11
Se atravè lafwa tou ke Sara li menm te resevwa fòs pou li te ka ansent yon desandans, epi, ke li te akouche yon pitit alòske l te fin depase laj; paske li te konsidere ke Sila ki te fè pwomès la, Li fidèl!
12
Konsa donk, se de yon sèl nonm, e, youn ki te deja fin mouri, ke yon desandans vin soti ki plen tankou zetwal nan syèl la, pou jan yo anpil, epi ki tankou sab ki bò lanmè, ke w pa ka konte.
13
Tout moun sa yo mouri nan lafwa, san ke yo pa t resevwa pwomès yo; men, yo te wè yo de lwen, e yo te asire de yo, e yo te adopte yo, yo te deklare ke yo menm, se etranje ak vwayajè yo te ye sou latè.
14
Avredi, moun ki di bagay sa yo, yo deklare kareman ke y ap chèche yon peyi;
15
e verite a, sèke si se peyi kote yo te soti a ke yo te gen nan lide yo, ebyen, yo t ap gen posiblite tounen ladan l.
16
Men kounye a la a, yo te gen anvi yon pi bon peyi, sa vle di, youn ki nan syèl la. Se poutèt sa ke Bondye pa wont dèske yo rele Li Bondye yo; paske, Li prepare yon vil pou yo.
17
Se pa mwayen lafwa ke Abraram, lè ke li te teste a, li te ofri Izarak kòm sakrifis; e, sila ki te resevwa pwomès la te ofri kòm sakrifis, sèl pitit gason ke l te genyen an.
18
Se de li ke yo te di, ke se nan Izarak ke desandans ou an va pote non w;
19
misye te met nan tèt li ke Bondye te gen pouvwa pou resisite l, menm pami mò yo; e se konsa tou ke li te rejwenn li gras a yon siy.
20
Se pa mwayen lafwa ke Izarak te beni Jakòb ak Esayi konsènan bagay ki t apral rive yo.
21
Pa mwayen lafwa ke Jakòb, lè li t apral mouri, li beni pitit gason Jozèf yo, epi li te adore Bondye pandan l panche pran apui sou tèt baton l lan.
22
Se pa mwayen lafwa ke Jozèf, lè l ap mouri, li te pale de depa pitit Izrayèl yo, epi misye te pase lòd konsènan zosman li.
23
Se pa mwayen lafwa ke Moyiz, lè l te fèt, paran l yo te kache l pandan twa mwa, paske yo te wè ke li te yon bèl timoun, e ke yo pa t pè dekrè wa a te pase a.
24
Se pa mwayen lafwa ke Moyiz, lè l te vin gran, te refize pou yo rele l pitit gason tifi Farawon an;
25
misye te chwazi pou l soufri move tretman ansanm ak pèp Bondye a, tan pou li ta jwi plezi peche pou yon ti moman.
26
Li te konsidere imilyasyon Kris la kòm pi gwo richès pase trezò nan peyi Lejip yo; paske misye te gen je l fikse sou prim rekonpans lan.
27
Se pa mwayen lafwa ke l te kite Lejip, san ke l pa t pè kòlè wa a, e li te rete fèm, kòmsi l te wè Sila a ki envizib la.
28
Se atravè lafwa ke li kenbe fèt Pak la ansanm ak zak wouze san an, dekwa pou sa pat rive ke sila ki t ap detwi premye-pitit yo ta va manyen premye-pitit pa pèp Izrayèl la.
29
Se pa mwayen lafwa ke yo te pase nan mitan Lanmè Wouj tankou l te tè sèk; sa ke Ejipsyen yo al eseye fè tou, epi yo te neye.
30
Se pa mwayen lafwa ke miray Jeriko yo tonbe, apre ke yo te ansèkle yo pandan sèt jou.
31
Se pa mwayen lafwa ke pwostitye a, Rahab, pa t peri ansanm ak sila yo ki pa t kwè a, lè ke li menm, li te resevwa espyon yo nan lapè.
32
E, kisa m va di ankò? Paske m pa t ap gen ase tan pou m ta pale de Jedeyon, e de Barak, e de Samson, e de Jefte; de David tou, ak Samyèl, epi de pwofèt yo.
33
Yo menm lan, ki atravè lafwa, te gen laviktwa sou wayòm, te tabli lajistis, te jwenn pwomès ke yo te fè yo, te fèmen bouch lyon,
34
etenn puisans flanm dife, chape anba kout epe, te nan feblès men yo te fè yo vin gen fòs, te vin gen kouraj nan goumen, te fè lame etranje yo pran rak devan yo.
35
Gen de fanm ki te resevwa moun pa yo ki te mouri epi ki te rejwenn lavi ankò; gen lòt moun yo te matirize e ki pa t dakò ke yo lage yo, dekwa pou yo te ka jwenn yon rezireksyon ki miyò.
36
Gen lòt toujou ki te sibi imilyasyon ak kout fwèt sovaj; wi, e plis pase sa, yo te anchennen e te pran prizon.
37
Yo te kalonnen yo ak wòch pou tiye yo, yo te siye yo koupe an de, yo fè yo pase mizè, yo te asasinen yo ak kout epe; yo t ap pwomennen ak rad an po mouton ak po kabrit sou yo, palefèt ke yo te san anyen, yo t ap soufri, yo te toumante;
38
(yo menm ke lemonn pa t merite), yo mache pwomennen nan dezè, nan mòn, nan gwòt, ak nan twou kav anba tè.
39
E, tout moun sa yo, kwake yo te gen bon temwayaj atravè lafwa, yo pa t jwenn pwomès la.
40
Bondye te gentan prevwa bagay ki pi bon pou nou, pouke yo pa t rive nan lapèfeksyon san nou menm.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!