Liv Ebre
Chapit 12
Klike la pou koute lekti chapit sa1
Konsa donk, palefèt ke nou wè jan nou antoure avèk kantite pil temwen sa yo, annou debarase tèt nou de tout fado, ansanm ak peche ki si fasil pou mare pye nou an; epi, annou kouri ak pasyans nan kous ki la devan nou an;
2
pandan ke nou fikse je nou sou Jezi, se Li menm ki pwodwi e ki tabli lafwa nou; e, poutèt lajwa sa a ki t ap tann Li an, Li te andire lakwa a, Li te meprize lawonte a, lèfini, Li te chita sou men dwat twòn Bondye a.
3
Nou dwe konsidere Sila a ki andire kalite opozisyon sa yo ke pechè yo te fè kont Li yo, dekwa pou nou pa febli, epi pou lespri nou pa dekouraje.
4
Nou poko reziste jis pou nou ta senyen nan lite kont peche;
5
epi, nou bliye mo ankourajman sa a ke yo te deklare ban nou an tankou bay pitit: Pitit gason m, se pa pou w meprize pinisyon Senyè a non; nonplis tou, se pa pou w dekouraje lè L ap korije w;
6
paske, moun ke Senyè a renmen an, Li korije l, e, Li kale tout pitit gason ke Li rekonèt yo.
7
Si nou andire pinisyon, Bondye va boule ak nou tankou ak pitit gason; vrèmanvre, ki pitit gason sa a ke papa a pa pini?
8
Men, si n egzante anba pinisyon ke tout pitit ap patisipe ladan l yo, alò, nou se timoun deyò, nou pa pitit gason.
9
Dayè, nou te gen papa dapre lachè yo ki te konn pini nou, lèfini, nou te gen respè pou yo; èske nou pa ta dwe soumèt pi plis toujou devan Papa lespri yo, epi pou nou ta gen lavi?
10
Paske, yo menm, vrèmanvre, se pou detwa jou ke yo te konn pini nou pou fè tèt pa yo plezi; alòske Li menm, se pou byen nou, ansòt pou nou ka vin patisipe nan sentete Li a.
11
Se vre ke okenn pinisyon kounye a la a sanble ke l pote kèkontan, men pito lapenn; men, apre sa, l ap donnen fwi jistis la ki plen ak lapè, pou sila yo ki te pase egzèsis la konsa a.
12
Kidonk, se pou nou fòtifye e bra nou ki balan yo, e jenou nou ki fèb yo.
13
Lèfini, se pou nou mache nan chemen ki dwat, dekwa pou sa pa rive ke sa ki kwochi ta kite wout la; men, kite ke l ta geri pito.
14
Chèche lapè ak tout moun, ansanm ak sanktifikasyon, san li menm, pyès moun p ap ka wè Senyè a.
15
Se pou nou veye pou sa pa rive ke pèsonn ta rate gras Bondye a; pou ke okenn rasin degoutans pa ta boujonnen latwoublay, e ke konsa, kèk nan nou ta va enfekte;
16
pou pa gen okenn fònikatè, okenn pwofàn tankou Esayi, ki, pou yon moso manje te vann dwa premye pitit li.
17
Paske, nou konnen kouman ke apre sa, lè misye te vle resevwa benediksyon an, li te jwenn refi; e, li pa t twouve okenn plas pou repantans, malgre ke l te ensiste pou chèche l ak dlo nan je.
18
Paske, nou pa t pwoche devan yon mòn moun ka manyen, epi k ap boule ak dife; nonplis devan nwasè, ni tenèb, ni tanpèt,
19
ni son kout twonpèt, ni bwi vwa k ap pale, tankou moun sa yo ki te tande l la, epi yo te mande pou yo pa t pale pawòl sa yo avè yo ankò,
20
difèt ke yo pa t ka sipòte sa ke yo te kòmande yo a: ke menm si se ta yon bèt ki ta va manyen mòn nan, se pou yo kalonnen l ak wòch pou tiye l, oswa pèse l ak yon flèch.
21
E, espektak la te sitèlman efreyan, ke Moyiz te di: Mwen pè anpil, e m ap tranble!
22
Men nou menm, se bò kote mòn Siyon an ke nou pwoche, ak nan lavil Bondye Vivan an, Jerizalèm ki nan syèl la, e bò kote yon foul zanj moun pa ka konte,
23
bò kote asanble jeneral ak asanble Premye Pitit la ki enskri nan syèl la, ak bò kote Bondye, ki se Jij tout bagay, e bò kote lespri moun jis sa ke yo te fè rive nan pèfeksyon an,
24
e bò kote Jezi, ki se Medyatè nouvo kontra a, e bò kote san an ki pou wouze a, ki deklare bagay ki pi bon pase san Abèl la.
25
Fè ansòt pou nou pa refize Sila k ap pale a. Paske, si moun yo ki te refize sila a ki te pale sou latè a pa t chape, se va plis toujou ke nou p ap chape, si nou ta vire do bay Sila k ap pale anwo nan syèl la.
26
Li menm ke vwa Li te fè latè tranble lè sa a; men kounye a, Li te pwomèt, Li te di konsa: Yon lòt fwa ankò, se pa p latè sèlman M ap fè tranble non, men se va syèl la tou.
27
E, mo sa yo: Yon lòt fwa ankò, yo vle di ke bagay sa yo ki kapab tranble yo ap disparèt, antan ke bagay ki te kreye; dekwa pou bagay ki pa kapab tranble yo va rete.
28
Poutèt sa, palefèt ke nou resevwa yon wayòm ke yo pa ka deplase, annou gen rekonesans, defason pou nou sèvi Bondye yon jan ki konvnab, ak respè e ak krentif pou Li.
29
Paske, Bondye nou an se yon dife devoran Li ye!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!