Liv Ebre
Chapit 13
Klike la pou koute lekti chapit sa1
Se pou lanmou frè ak frè kontinye.
2
Pa bliye byen resevwa etranje lakay nou; paske se nan konsa ke kèk moun te resevwa zanj lakay yo san yo pa t konnen.
3
Sonje sila ki nan prizon yo, tankou nou te prizonye ansanm ak yo; e sila ke y ap maltrete yo, tankou nou te nan yon kò y ap maltrete.
4
Maryaj se yon bagay ki onorab tout jan, e kabann maryaj la dwe rete san salte; paske Bondye ap jije malfezan yo ak adiltè yo.
5
Se pou konduit nou san konvwatiz, lèfini, nou dwe kontante nou ak sa ke n gen nan men nou; paske se Li ki di konsa: Mwen p ap janm lage w, ni Mwen pa p janm abandone w.
6
Konsa donk, nou kapab di ak asirans: Senyè a se Èd mwen, e mwen p ap pè sa yon moun ta ka fè m.
7
Se pou nou sonje sila k ap dirije nou yo, yo menm ki te pote Pawòl Bondye a ban nou; nou dwe byen gade ki fwi ke konpòtman nan lavi yo bay, epi suiv egzanp lafwa yo a.
8
Jezi Kris se menm nan Li ye, ayè, jodi a, e pou toutan.
9
Pinga n kite y ap bwote nou ale avèk ansèyman ki diferan e dwòl. Paske, se yon bon bagay sa ye, lòske se ak gras kè nou tabli, e nonpa ak manje, sa ki pa t benefisye moun ki t ap okipe tèt yo ak bagay sa yo.
10
Nou gen yon lotèl kote ke sila yo k ap bay sèvis nan tabènak la pa gen dwa pou yo manje.
11
Paske, kò bèt sa yo, yo menm ke san yo te antre anndan sanktyè a ak sakrifikatè an chef la pou peche, se padeyò kan an yo te boule yo.
12
Se poutèt sa tou ke Jezi, pouke Li te ka sanktifye pèp la ak pwòp san pa Li, Li te soufri padeyò pòtay la.
13
Alò, annou sòti al jwenn Li padeyò kan an, pou nou pote chay imilyasyon L nan.
14
Paske isiba, nou pa gen okenn vil ki pèmanan, men n ap chèche sa ki gen pou vini an.
15
Alò, se pa mwayen Li menm ke nou dwe ofri sakrifis lwanj bay Bondye san rete, ki vle di, fwi pobouch nou k ap nonmen non Li ak remèsiman.
16
Men, pa bliye pou nou fè byen, e pou nou ede moun, paske se nan kalite sakrifis sa yo ke Bondye pran bonjan plezi.
17
Obeyi sila k ap dirije nou yo, e soumèt tèt nou; paske y ap veye sou nanm nou, difèt ke yo va gen pou rann kont, dekwa pou yo va fè l ak lajwa e nonpa ak tristès, paske sa p ap nan avantaj nou.
18
Lapriyè pou nou isit la, avredi, nou gen asirans ke nou gen konsyans nou klè, paske se nan tout bagay ke nou vle viv onètman.
19
M ap ensiste mande nou pou n fè sa, dekwa pou m ta va retounen vin jwenn nou pi bonè.
20
Kounye a la a, se pou Bondye ki bay lapè a, Li menm ki te resisite Jezi Senyè nou an, Gran Bèje twoupo yo, atravè san kontra etènèl la,
21
va fè nou rive alapèfeksyon nan tout kalite bòn zèv pou ke volonte Li fèt, pou ke Li akonpli nan nou sa ki gen bonjan plezi nan je Li atravè Jezi Kris, Li menm ki gen tout glwa pou letan e pou letènite. Amèn.
22
Ansuit, frè yo, mwen mande nou souple, pou nou resevwa pawòl egzòtasyon sa a, paske se yon lèt an detwa mo ke mwen ekri nou.
23
Se pou n konnen ke Timote frè nou lage, li an libète; si misye ta vini talè konsa, m ap vin wè nou avè l.
24
Salye tout sila yo ki se dirijan nou yo, ansanm avèk tout Sen yo. Moun Itali yo salye nou.
25
Se pou gras la avèk nou tout. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!