Liv Jak
Chapit 1
Klike la pou koute lekti chapit sa1
Jak, yon sèvitè Bondye e Senyè Jezi Kris, a douz tribi yo ki epapiye lòt bò; mwen salye nou!
2
Frè mwen yo, se pou nou konsidere sa ak anpil lajwa lè nou tonbe anba divès tantasyon;
3
paske nou konn sa: lè lafwa nou teste, li pwodui pasyans.
4
Men, se pou n kite pasyans opere travay li a jis rive nan pèfeksyon, dekwa pou nou kapab vin okonplè, ann antye, pou nou pa bezwen anyen.
5
Si nenpòt nan nou manke sajès, se pou li mande Bondye, Li menm ki bay tout moun san mezi, e, san repwòch; e, yo va ba li l.
6
Mentou, se pou l mande ak lafwa, san l pa doute nan anyen. Paske, yon moun k ap doute, li tankou yon vag lanmè ke van ap pouse epi ke l voye ale.
7
Alò, se pa pou yon moun konsa panse ke li ta ka resevwa anyen nan men Senyè a.
8
Yon moun ki gen de lide, ki pa estab nan tout sa l ap fè.
9
Se pou frè ki malere a, rejwi dèske li elve pi wo;
10
men, se pou rich la rejwi, dèske li bese pi ba; paske, se tankou flè zèb, li gen pou disparèt.
11
Paske, solèy la annik leve ak yon chalè k ap boule, epi, li fennen zèb la, e, flè l la tonbe, epi, tout bèl li te bèl la, disparèt; se konsa tou, ke moun ki rich la va fennen nan zafè l.
12
Moun ki andire tantasyon, se yon moun beni li ye; paske, lè l teste, li va resevwa kouwòn lavi a, ke Senyè a te pwomèt moun ki renmen L yo.
13
Se pa pou pèsonn di lè l tante: Se Bondye ki tante m; paske, Bondye pa kapab tante pa sa ki mal, nonplis tou, Li pa tante pèsonn.
14
Men, chak moun tante lè pwòp dezi pa l rale l, epi chame l.
15
Konsa, lè dezi a jèmen, li pwodui peche, epi, peche li menm, lè l fini, li pwodui lanmò.
16
Pinga nou twonpe tèt nou, frè mwen yo,
17
tout bon kado e tout kado ki okonplè, soti anwo, epi, li desann soti bò kote Papa ki kreye tout limyè yo; avèk Li, pa gen ni enstabilite, ni lonbraj chanjman.
18
Dapre pwòp volonte L, Li ban nou nesans pa mwayen Pawòl verite a, pou nou ka vin yon sòt de premye fwi tout kreyati Li yo.
19
Poutèt sa, frè byenneme mwen yo, se pou chak moun prese koute, se pou l lan pou l pale, pou l pa kouri fè kòlè;
20
Paske, kòlè lèzòm, pa akonpli jistis Bondye.
21
Konsa donk, mete tout salte ak tout eksè mechanste sou kote, e, resevwa ak dousè, Pawòl ki grefe nan nou an, ki kapab sove nanm nou.
22
Men, se pou nou mete Pawòl la an pratik, se pa koute pou n ap koute l sèlman, pou n ap twonpe tèt nou.
23
Paske, si yon moun se youn k ap koute Pawòl la, e ke l pa mete l an pratik, li tankou yon moun ki gade figi l nan glas;
24
e, apre ke l fin byen gade figi l, li ale fè wout li, epi, menm lè a, li bliye a kisa l te sanble.
25
Men, nenpòt moun ki egzamine lalwa libète ki rive nan pèfeksyon an, epi, ki pèsevere ladan l, ki pa yon moun ki tande, san l pa gen memwa, men pito, ki se yon moun ki mete travay la an pratik; moun sa a ap beni nan aktivite ke l ap mennen.
26
Si nenpòt moun pami nou panse ke l ap fè sèvis relijyon, e ke li pa bride lang li, konsa, l ap twonpe pwòp kè li, sèvis relijyon moun sa a, pa gen valè.
27
Men, sèvis relijyon ki sen, e san tach devan Bondye Papa a, se pou l vizite òfelen ak vèv yo, nan soufrans yo, epi, se pou l kenbe tèt li andeyò salte lemonn yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!