Liv Jak
Chapit 2
Klike la pou koute lekti chapit sa1
Frè m yo, pinga nou kenbe lafwa nan Senyè Jezi Kris, Senyè laglwa a, avèk patipri.
2
Paske, si sa rive ke nan asanble nou an, yon nonm ak bag ann ò e bèl rad ta antre; apre sa, ke vin gen yon pòv ak vye rad ki antre tou.
3
Epi, ke w montre respè pou sila ki gen bèl rad la, e, ou di l: Chita la a, nan yon bon plas, alòske w di pòv la: Kanpe la a, oswa: Chita isit la anba machpye m lan;
4
èske nou pa nan fè patipri nan nou menm, epi, èske nou pa vin tounen jij ki gen move lide?
5
Tande, byenneme frè m yo, èske Bondye pa chwazi pòv nan monn sa a, pou yo rich nan lafwa, epitou, pou yo eritye wayòm ke Li te pwomèt moun ki renmen Li yo?
6
Men, n ap meprize pòv yo. Èske se pa moun rich yo k ap eksplwate nou, epi ki trennen nou nan tribinal?
7
Èske yo pa pale mal non Sila ki gen merit la, non Sila ke nou jwenn apèl de Li a?
8
Si nou akonpli lalwa Wa a, dapre Lèzekriti ki di: Se pou w renmen pwochen w, menm jan w renmen tèt ou a, nou byen fè.
9
Men, si n ap fè patipri ak moun, n ap komèt peche, e la lalwa a kondane nou antan ke moun k ap vyole lalwa.
10
Paske, nenpòt moun ki ta obsève tout lwa a, men ki ta vyole yon sèl pati nan li, ebyen, li koupab pou tout.
11
Paske, Sila ki di: Pa komèt adiltè a, Li di tou: Pa tiye moun. Alò, si w pa komèt adiltè, men w tiye moun, ou vin tounen yon moun k ap vyole lalwa.
12
Jan nou pale a, se konsa nou dwe aji; tankou moun ke yo gen pou jije pa lalwa libète a.
13
Paske, se jijman san mizerikòd ke yon moun ap jwenn, si li menm li pa t gen mizerikòd; e, mizerikòd gen laviktwa sou jijman.
14
Kisa sa benefisye, frè m yo, pou yon moun di ke l gen lafwa, alòske li pa gen zèv? Èske lafwa sa a ka sove l?
15
Si yon frè oswa yon sè ta san rad, epi yo pa ta gen manje pou jounen an,
16
e ke youn nan nou ta di yo: Ale ak lapè, chofe tèt nou, epi plen vant nou, san ke nou pa ba yo bagay sa ke kò yo bezwen an; kisa sa regle?
17
Se konsa tou, lafwa, si l pa gen zèv, li mouri, difèt ke li pou kont li.
18
Men, yon moun ta ka di: Ou gen lafwa, e, mwen gen zèv; montre m lafwa w ki san zèv ou a, epi, m ap montre w lafwa m, pa mwayen zèv mwen yo.
19
Nou kwè ke se yon sèl Bondye ki genyen, nou byen fèt; demon yo kwè sa tou, e yo tranble.
20
Men, èske w vle konprann, o, moun egare, ke lafwa mouri, lè li san zèv?
21
Èske papa nou Abraram pa t jistifye poutèt zèv, lè li te ofri Izarak sou lotèl la?
22
Èske w wè kijan lafwa t ap travay ansanm ak zèv li, e ke se pa mwayen zèv yo ke lafwa rive nan pèfeksyon?
23
Epitou, Lekriti a te akonpli, sa ki te di: Abraram te kwè Bondye, e, yo te konsidere sa tankou jistis pou li; e, yo te rele l zanmi Bondye.
24
Donk nou wè kijan ke se pa mwayen zèv, yon moun jistifye, e nonpa ak lafwa sèlman.
25
Menm jan an tou, èske Rahab, pwostitye a, pa t jistifye pa mwayen zèv, lè li te resevwa mesaje yo, e ke l te voye yo ale pa yon lòt wout?
26
Paske, menm jan ke kò a ki san lespri a, mouri; se konsa tou ke lafwa a ki san zèv la mouri tou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!