Liv Jak
Chapit 3
Klike la pou koute lekti chapit sa1
Frè mwen yo, se pa pou gen anpil moun k ap anseye, paske nou konnen ke n ap resevwa pi gwo kondanasyon.
2
Paske, se nan anpil bagay ke nou tout bite; si yon moun pa bite nan pawòl, moun sa a, se yon moun ki rive alapèfeksyon, e, ki kapab bride tout kò a.
3
Gade yo mete baboukèt nan bouch cheval pouke yo obeyi nou, epi, nou dirije tout kò yo nèt.
4
Gade bato yo tou, ki malgre yo gwo konsa a, epi ke se gwo van k ap pouse yo, poutan, yo dirije yo ak yon ti gouvènay, nan nenpòt direksyon kaptenn nan deside.
5
Menm jan an tou, lang, se yon ti manm li ye, men li vante tèt li de gwo zafè; nou wè kòman yon ti dife ka boule yon gwo rak bwa!
6
E, lang, se yon dife li ye, se bitasyon inikite; se konsa lang lan la pami manm nou yo, pou li sal tout rès kò a, epi li mete dife nan chemen lavi a; apre sa, se lanfè ki met dife nan li.
7
Paske, tout kalite bèt ak tout kalite zwazo, kalite sèpan, ak kalite sa ki nan lanmè yo, yo tout donte, e, yo te donte pa lèzòm;
8
men, lang, pèsonn pa ka donte l; li se yon mal ke yo pa ka kontwole, li plen ak pwazon mòtèl.
9
Se avè l nou beni Bondye Papa a, e se avè l nou modi lèzòm, ki fèt nan pòtre Bondye.
10
Nan menm bouch la, e benediksyon, e malediksyon soti; frè m yo, bagay sa yo pa dwe konsa.
11
Èske yon sous dlo ponpe e dlo dous, e dlo anmè an menm tan?
12
Èske pye figfrans lan kapab donnen grenn oliv, oswa pye rezen an donnen figfrans? Se menm jan an tou ke yon sous dlo pa kapab ponpe dlo dous ak dlo sale ansanm.
13
Kiyès ki yon nonm ki saj e ki plen konesans pami nou la a? Se pou l montre bòn konduit li, pa mwayen zèv, avèk dousè ki soti nan sajès.
14
Men, si nou gen konvwatiz anmè, e n ap fè kont nan kè nou, pa vante tèt nou, epi, pa bay manti kont laverite a.
15
Sajès sa a pa desann sot nan syèl, men li sot sou latè, li sot nan sans lèzòm, li sot nan dyab la.
16
Paske, kote anvi ak fè kont ye, gen konfizyon ak tout move zaksyon.
17
Men, sajès ki sot anwo a, toudabò, li sen; apre sa, li chèche lapè, li dou, epi, li tande rezon, li gen anpil kè sansib ak bon fwi, li pa nan patipri, epi, li pa nan ipokrizi.
18
Alò, fwi lajistis la, li simen nan lapè, pa mwayen moun k ap fè lapè yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!