Liv 1 Pyè
Chapit 1
Klike la pou koute lekti chapit sa1
Pyè, yon apot Jezi Kris, a sila yo ki se etranje e ki gaye toupatou nan Pon, nan Galasi, Kapadòs, ann Azi, ak nan Bitini;
2
nou menm ki se Chwazi yo, dapre konesans davans Bondye Papa a, atravè sanktifikasyon Lespri a pou ka rive nan obeyisans pa mwayen san Jezi Kris ki wouze nou an. Se pou gras ak lapè miltipliye pou nou.
3
Se pou Bondye e Papa Jezi Kris Senyè nou an beni, Li menm ki, dapre mizerikòd ann abondans Li a, te reban nou lavi ankò ak yon esperans ki vivan, pa mwayen rezireksyon Jezi Kris pami mò yo;
4
pou rive a yon eritaj ki pa ka gate, e ki san tach, epi ki pa ka fennen, se sa ki rezève nan syèl la pou nou menm
5
ki ret fèm pa puisans Bondye atravè lafwa pou rive nan sali nanm nan ki va parèt aklè nan dènye tan yo.
6
Nou va gen pou n rejwi nan sa, menmsi kounye a pou yon tan, nou blije nan lapenn akòz zeprèv yo ki anpil,
7
dekwa pou tès lafwa nou an, ki gen plis valè pase lò ki li menm ka peri malgre ke l teste ak dife, li va rive jwenn lwanj, ak onè, ak glwa lè aparisyon Jezi Kris la;
8
Li menm ke nou pa janm wè a, men ke nou renmen an; nan Li menm nou kwè a, atout nou pa wè L, epoutan se ak yon lajwa depase mezi n ap rejwi e ki plen ak glwa.
9
Konsa, sa nou va resevwa kòm rezilta lafwa nou an, se va sali nanm nou.
10
E, konsènan sali nanm sa a, pwofèt yo te poze kesyon e yo te fouye anpil, yo menm ki te pwofetize sou gras la ki t ap genyen pou vini pou nou an.
11
Yo te chèche konnen kijan, oubyen nan ki epòk ke Lespri Kris ki te nan yo a te montre, lè Li temwaye davans de soufrans Kris yo, e de glwa a ki va suiv la.
12
E, se ba yo ke sa te revele ke bagay sa yo pa t pou tèt pa yo, men pito, se pou nou menm ke yo t apral sèvi, e se sa ke kounye a la a y ap rapòte ban nou pa mwayen moun sa yo ki te preche nou levanjil la avèk Lespri Sen an ke yo te voye soti nan syèl la. Se yon kalite bagay ke zanj yo te gen dezi foure je ladan yo.
13
Kidonk, se pou nou mare senti bonkonprann nou, nou dwe ret tèt klè, epi, met espwa nou jiska lafen sou gras sa a ke y ap pote ban nou an, lè Jezi Kris va parèt la.
14
Tankou timoun obeyisan, se pa pou nou konfòme tèt nou dapre ansyen move dezi nan tan iyorans nou an;
15
men, menm jan Sila ki fè apèl ban nou an, sen an; se konsa tou pou nou sen nan tout konpòtman nou.
16
Paske, men sa ki ekri: Se pou nou sen, paske Mwen sen.
17
E, si se Papa a ke n ap rele, Li menm ki ap jije san patipri dapre zèv chak moun nan, se pou n pase sejou nou isiba a ak krentif.
18
Paske, nou konn sa byen, nou pa t rachte ak bagay ki ka peri, tankou ajan ak lò, pou nou te soti anba konpòtman san sans ke nou te resevwa pa mwayen tradisyon nan men zansèt nou yo;
19
men, se te ak san Kris ki koute chè a, ki tankou san pa yon ànyo san defo e san tach;
20
ki vrèmanvre te gentan òdone davans depi anvan kreyasyon monn lan; men, ki te manifeste nan dènye tan sa yo la a pou nou.
21
Se pa mwayen Li menm ke nou kwè nan Bondye, ki te resisite L pami mò yo, epi ki ba Li laglwa a, dekwa pou lafwa ak esperans nou ava nan Bondye.
22
Difèt ke nou te pirifye nanm nou nan obeyi nou te obeyi verite a atravè Lespri a, e nou te demontre yon lanmou san ipokrizi pou frè yo, se pou nou veye aske nou youn renmen lòt ak yon kè ki pwòp.
23
Kòm nou nedenouvo, nonpa ak yon semans ki kapab gate, men ak youn ki pa ka gate, pa mwayen Pawòl Bondye a ki vivan e k ap rete la pou tout tan.
24
Paske, tout kalite lachè se tankou zèb yo ye; epi, glwa lòm se tankou flè zèb sa ye; zèb la seche, lèfini, flè l la tonbe.
25
Men, Pawòl Bondye a ap ret la pou tout tan. E se Pawòl sa a ki te preche ban nou an pa mwayen levanjil la.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!