Liv 1 Pyè
Chapit 2
Klike la pou koute lekti chapit sa1
Alò, pandan n ap met tout mechanste, tout riz, tout ipokrizi, lanvi, ak medizans sou kote,
2
tankou tibebe ki fèk fèt, se pou nou gen dezi pou lèt san dekoupe ki se Pawòl la; dekwa pou nou ka grandi konsa,
3
si nou te gentan goute jan ke Senyè a gen gras.
4
Se pou nou pwoche kote L, kòmsi se yon wòch vivan, ke lèzòm avredi, te rejte; men ke Bondye te chwazi, e ki gen anpil valè.
5
Nou menm tou, tankou wòch ki gen lavi, n ap bati kay espirityèl ak tèt nou, yon kategori prèt ki sen, pou nou ofri sakrifis espirityèl ki akseptab a Bondye pa mwayen Jezi Kris.
6
Se poutèt sa tou ke Lekriti a gen sa a ladan l: Gade non! Mwen mete nan Siyon yon wòch poto mitan, ki chwazi, ki koute chè, e moun sa a ki kwè nan Li a, li pa p sot wont.
7
Donk, pou nou menm ki kwè a, Li gen gwo pri; men, pou sila yo ki dezobeyisan yo, wòch la ke moun yo ki t ap bati a voye jete a, se li menm ki vin wòch prensipal ang kwen kay la,
8
e, se yon wòch ki lakòz moun bite, yon wòch k ap ofanse moun, yo menm sa a ki bite a Pawòl la, poutèt yo dezobeyisan an, e se sa tou ki te pare pou yo.
9
Men nou menm, nou se yon jenerasyon Bondye chwazi, yon kategori prèt wayal, yon nasyon ki sen, yon pèp ki gen Mèt; dekwa pou nou ka fè wè bonjan kalite Sila a ki te rele nou sot nan tenèb yo pou nou vini nan limyè admirab Li a.
10
Nou menm ki nan tan lontan pa t yon pèp, twouve kounye a ke nou se pèp Bondye; nou menm ki pa t resevwa mizerikòd, twouve kounyè a nou resevwa mizerikòd.
11
Byenneme ki chè pou mwen yo, m ap egzòte nou, antan ke nou se etranje ak vwayajè, pou ke nou di non a move lanvi lachè k ap fè nanm nan lagè.
12
Konpòtman nou dwe onèt pami Payen yo; dekwa pou menm kant yo ta pale kont nou tankou n se malfezan, poutèt bòn zèv nou yo ke yo va wè yo, y ava glorifye Bondye nan jou ke Li vizite yo a.
13
Se pou nou soumèt nou devan tout otorite ke lèzòm tabli, fè sa pou Senyè a; keseswa devan wa a, kòm souvren,
14
oswa devan gouvènè yo; e, fè menm jan an tou pou sila ke l voye yo pou pini malfektè, e pou fè lwanj sila k ap fè byen yo.
15
Paske, se volonte Bondye sa, dèske nan fè sa ki byen, nou kapab fèmen bouch inyorans lan ki lakay ensanse yo.
16
Viv antan ke moun ki lib, men pa itilize libète a kòm kouvèti pou malfezans, sepandan, se pou n viv tankou sèvitè Bondye.
17
Onore tout moun. Renmen frè yo. Gen krentif pou Bondye. Onore wa a.
18
Sèvitè yo, soumèt nou devan mèt nou yo ak tout krentif; se pa ak sila ki bon e ki janti avèk nou yo sèlman non, men tou, ak sila ki akaryat yo.
19
Paske, sa merite konpliman, si poutèt konsyans li anegad Bondye, yon moun ta sipòte lapenn, e ke li soufri enjisteman.
20
Avredi, ki glwa ki gen nan sa, si y ap maltrete nou poutèt fòt nou komèt, epi, nou andire sa ak pasyans? Men si, alòske n ap fè sa ki byen, epi nou soufri pou sa, lèfini, nou pran sa ak pasyans, sa se yon bagay ki akseptab avèk Bondye.
21
Dayè, se poutèt sa menm ke nou te aple; paske Kris soufri tou pou nou, Li kite yon egzanp pou nou, dekwa pou nou suiv tras pye Li yo.
22
Li menm ki pa t komèt ankenn peche, nonplis ke yo pa t jwenn riz soti nan bouch Li;
23
Li menm, ke lè yo te joure L, Li pa t joure tou; lè Li t ap soufri, Li pa t fè menas; men pito, Li te remèt tèt Li ba Sila ki jije ak ladwati a;
24
Li menm ki pou tèt pa L te pote peche nou yo nan pwòp kò pa Li sou bwa a; dekwa pou nou menm ki mouri parapò ak peche, nou va rive viv pou ladwati; e, Li menm ke nan blese Li yo nou te jwen gerizon.
25
Paske, nou te tankou mouton ki te pèdi lawout, men kounyè a, nou tounen al jwenn Bèje a ak Gadyen nanm nou an.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!