Liv 1 Pyè
Chapit 3
Klike la pou koute lekti chapit sa1
Konsa tou, nou menm madanm yo, se pou nou soumèt nou a mari nou, dekwa pou ke si genyen pami yo ki p ap obeyi Pawòl la, kondit madanm yo va konvenk yo san pawòl,
2
lè yo gade yo wè jan nou konpòte tèt nou ak krentif.
3
Lèfini, abiman nou pa bezwen pou se kwafi cheve trese, bijou ann ò, oswa met bèl rad;
4
men pito, kite ke se abiman moun nan ki kache anndan kè a, sa ki pa ka gate a, sa menm ki se abiman yon lespri ki janti e ki trankil, sa ki gen gwo pri nan je Bondye.
5
Paske, nan tan lontan, medam ki te sen yo, epi ki te fè Bondye konfyans yo, se konsa tou ke yo te konn abiye tèt yo, e ke yo te soumèt devan pwòp mari yo.
6
Menm jan ke Sara te obeyi Abraram, e ke li te rele misye senyè, ebyen, se pitit fi manzè nou ye, toutotan ke n ap fè sa ki byen, e ke nou pa kite ankenn bagay twouble nou.
7
Menm jan an tou, mari yo, se pou nou viv ak madanm nou dapre konesans, pou nou onore madanm nou, dèske li se yon kò ki pi fèb; e, tankou ke nou toulède se eritye gras lavi a; dekwa pou lapriyè nou pa jwenn obstak.
8
Lèfini, se pou nou tout met tèt ansanm, pou nou gen kè sansib youn pou lòt, lanmou fratènèl, gen pitye, gen koutwazi.
9
Se pa pou nou rann mal ak mal, ni jouman ak jouman; okontrè, se beni pou nou beni moun, difèt ke nou konnen ke se pou sa ke yo te fè nou apèl, dekwa pou nou ta va eritye yon benediksyon.
10
Paske, yon moun ki ta renmen lavi, e ta vle wè bon kalite jou, se pou l frennen lang li nan sa ki mal, epi pou l anpeche pobouch li pale ak okenn riz.
11
Se pou li kanpe lwen sa ki mal, epi pou l fè sa ki byen; se pou l chèche lapè, epi pou l rapousuiv li;
12
paske je Senyè a fikse sou moun ki jis yo, e zòrèy Li yo louvri pou koute lapriyè yo. Men, figi Senyè a rete kont sila k ap fè mal yo.
13
Epitou, kiyès ki va maltrete nou si se moun k ap suiv bagay sa ki byen nou ye?
14
Dayè, menmsi nou ta soufri akòz jistis, n ap gen kèkontan; alò, pinga nou pè zak teyoris yo a; nonplis tou, pa kite sa twouble lespri nou.
15
Men pito, se pou nou sanktifye Senyè Bondye a nan kè nou; epi, se pou nou toujou pre pou nou bay yon repons bay tout moun ki poze kesyon sou rezon nou genyen pou esperans sa a ki lakay nou an; fè sa ak jantiyès e ak krentif.
16
Kenbe konsyans nou pwòp; konsa, menm lè yo ta va pale nou mal, kòmkwa se malfektè nou ta ye, pouke se yo menm k ap fè fo akizasyon sou bòn konduit nou an Kris, se yo ki va soti wont.
17
Paske, si se ta volonte Bondye, li pi bon ke nou soufri poutèt byen ke n fè, tan pou se ta pou mal.
18
Paske, Kris, Li menm tou, te soufri poutèt peche; Moun ki jis la, pou moun ki pa jis yo, dekwa pou Li te ka mennen nou bay Bondye, kòm yo te tiye nou nan lachè, men, ke yo te ban nou lavi pa mwayen Lespri a.
19
Se pa mwayen Lespri a tou, ke Li te ale e ke Li te preche lespri yo ki te nan prizon an;
20
yo menm ki yon lè te rebèl, nan epòk ke pasyans manch long Bondye a te rete tann nan jou Noye yo, pandan ke lach la t ap prepare a; se te ladan l ke yon ti ponyen moun, ki vle di, uit nanm antou, te chape atravè dlo a.
21
Se menm senbòl sa a kote ke batèm nan, li menm tou, sove nou kounye a (nonpa ke li wete salte lachè a; men, li se repons yon konsyans ki pwòp anegad Bondye,) pa mwayen rezireksyon Jezi Kris la.
22
Li menm ki te monte al nan syèl la, e ki sou men dwat Bondye; e, zanj yo, otorite yo, ak puisans yo soumèt anba L.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!