Liv 1 Pyè
Chapit 4
Klike la pou koute lekti chapit sa1
Konsa donk, tankou Kris te soufri pou nou nan lachè a, se pou nou ame tèt nou ak menm zam sa a tou e avèk menm panse a; paske, moun ki soufri nan lachè, li fini ak peche;
2
dekwa pou li pa kontinye viv rès tan l ap pase nan lachè a pou satisfè move dezi lèzòm, men pito, pou fè volonte Bondye.
3
Paske, nou te pase ase tan nan lavi nou ap fè volonte Payen yo, lè nou t ap mache nan devègonday, nan move dezi, nan tafyatè, nan banbòch, nan banbilay, ak nan idolatri ki abominab.
4
Se sa k fè yo twouve sa dwòl dèske nou pa kouri ale nan menm kalite debòch depase limit sa yo ansanm avèk yo ankò a, kifè y ap pale nou mal la.
5
Yo va gen pou rann kont bay Sila a ki pare pou Li jije vivan yo ak mò yo.
6
Avredi, se pou rezon sa a ke levanjil la te preche tou bay sila ki mouri yo, dekwa pou yo ka jije yo dapre lèzòm nan lachè, men pou yo viv nan lespri, dapre Bondye.
7
Men, lafen tout bagay pre rive; alò, se pou tèt nou klè, epi veye pou nou lapriyè.
8
Lèfini, plis pase tout bagay, se pou nou gen yon lanmou toulimen youn pou lòt; paske lanmou kouvri yon kantite peche.
9
Se pou youn resevwa lòt lakay li san plenyen.
10
Jan ke nou chak resevwa don an, se konsa nou youn dwe mete li osèvis lòt yo, tankou bon administratè divèsite ki nan gras Bondye a.
11
Si yon moun ap pale, kite ke se de Pawòl Bondye l ap pale; si yon moun ap bay sèvis, kite l fè l jan Bondye ba l kapasite pou sa; pouke nan tout bagay, Bondye kapab glorifye atravè Jezi Kris, Li menm ki gen lwanj ak pouvwa pou letan e pou letènite. Amèn.
12
Byenneme, se pa pou n sezi non poutèt eprèv sa yo ki tankou chalè dife k ap boulvèse nou yo, kòmsi si ta de bagay dwòl k ap pase nou;
13
okontrè, se rejwi nou dwe rejwi, difèt ke n ap patisipe nan soufrans Kris yo; dekwa pouke lè glwa L la ava parèt, nou va gen kèkontan tou ak yon lajwa depase mezi.
14
Si y ap avili nou poutèt non Kris, nou se moun ki beni; paske Lespri laglwa a, Lespri Bondye a ret poze sou nou; sou bò pa yo, se pale yo pale Li mal; alòske sou bò pa nou, se glorifye nou glorifye Li.
15
Men, pinga nou kite ankenn moun soufri antan ke kriminèl, oswa kòm vòlè, oswa kòm malfektè, oswa kòm tripòt k ap antre nan zafè moun.
16
Men, si nenpòt moun ta soufri kòm Kretyen, li pa dwe wont; okontrè, se pou li bay Bondye glwa poutèt sa.
17
Paske, lè a rive pouke jijman an se lakay Bondye a li kòmanse; e, si li kòmanse anpremye avèk nou, kijan sa va fini menm pou sila yo ki pa obeyi levanjil Bondye a?
18
Bon, si moun ki jis yo, se apenn ke yo rive sove, ki kote moun ki san respè pou Bondye yo ak pechè yo gad menm?
19
Konsa atò, se pou sila yo k ap soufri dapre volonte Bondye a, lage pwoteksyon nanm yo nan men Li, e kontinye fè sa ki byen; tankou ke yo lage l nan men yon Kreyatè ki fidèl.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!