Liv 1 Pyè
Chapit 5
Klike la pou koute lekti chapit sa1
A ansyen yo ki pami nou yo, men sa ke mwen ankouraje nou fè, mwen menm ki se yon ansyen tou, e yon temwen soufrans Kris yo, epitou yon patisipan nan glwa ki gen pou parèt la.
2
Se pou nou nouri twoupo ki pami nou yo, veye sou yo, nonpa kòm yon bagay ke yo fòse nou fè, men pito kòm yon bagay ke nou vle fè. Pa fè l pou n pwofite nan vye magouy, men pito, ak yon lespri dispoze.
3
Nonplis tou pa tankou chèf sou tèt eritaj Bondye a, men pito, tankou ke nou se egzanp pou twoupo a.
4
Konsa, lè Bèje an chèf la va parèt, nou va resevwa yon kouwòn laglwa ki pa p fennen.
5
Menm jan an, nou menm jenn yo, soumèt nou anba ansyen yo. Wi, se pou nou tout soumèt youn anba lòt, epi abiye tèt nou ak imilite; paske, Bondye reziste kont moun ki plen ògèy yo, men, Li bay moun ki gen imilite yo gras.
6
Konsa donk, se pou nou rabese tèt nou anba men puisan Bondye a, pouke Li ka leve tèt nou anlè, lè tan an rive pou sa fèt.
7
E, vide tout tètchaje nou yo sou Li, paske, Li pran ka nou.
8
Se pou nou ret tèt klè, je kale, paske lènmi nou an, dyab la, tankou yon lyon k ap gwonde, k ap vire won chèche kilès moun li ta ka devore.
9
Se pou nou kenbe tèt tennfas ak li nan lafwa; e, konnen ke se menm soufrans sa yo ke frè w yo ap pase nan lemonn.
10
Men, Bondye ki gen tout gras la, Li menm ki te fè apèl ba nou nan glwa etènèl Li a pa mwayen Kris Jezi, apre ke nou ta fin soufri pou yon ti moman, L ap fè n rive alapèfeksyon, L ap tabli nou, L ap fòtifye nou, L ap fè nou kanpe djanm.
11
Se pou Li menm ke glwa ak puisans ye pou letan e pou letènite. Amèn.
12
Se pa mwayen Silven, ki, nan je pa m se yon sèvitè fidèl pou nou, ke mwen ekri bout lèt sa a; kote ke mwen konseye e mwen temwaye ke se nan bon jan gras vre Bondye a ke nou kanpe la a.
13
Asanble ki nan Babilòn nan, ki se moun Chwazi ansanm avèk nou, salye nou; e Mak, pitit gason m nan salye nou menm jan an tou.
14
Nou youn salye lòt ak yon bo afeksyon. Se pou lapè avèk nou tout ki nan Kris Jezi. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!