Liv 2 Pyè
Chapit 1
Klike la pou koute lekti chapit sa1
Simon Pyè, yon sèvitè e yon apot Jezi Kris, a sila yo ki ansanm avèk nou, te resevwa menm kalite lafwa ki plen valè a, atravè dwati Bondye ak Sovè nou an Jezi Kris.
2
Se pou gras ak lapè miltipliye ban nou atravè konesans Bondye ak Jezi, Senyè nou an.
3
Kòm puisans Li antan ke Bondye ban nou tout bagay ki gen pou wè avèk lavi ak devosyon, atravè konesans de Sila ki te fè apèl ban nou an pou rive nan laglwa ak kalite moral;
4
kote ke nou te resevwa de kalite pwomès ki depase limit nan grandè, e ki gen gran valè, dekwa pouke nou va gen mwayen pou nou patisipe nan nati Bondye, apre ke nou te chape anba koripsyon sa ki nan lemonn nan atravè move dezi.
5
E, anplis de sa, fè tout efò pou ke sou lafwa nou, nou ajoute kalite moral; e sou kalite moral, konesans;
6
epi sou konesans, tanperans; answit sou tanperans, pasyans; apre sa, sou pasyans, devosyon pou Bondye;
7
e sou devosyon pou Bondye, jantiyès fratènèl; lèfini, sou jantiyès fratènèl, ajoute lanmou.
8
Vrèmanvre, si bagay sa yo ta lakay nou, epi ke yo ta va ann abondans, yo t ap fè ke nou pa ni wazif, ni san fwi nan konesans nou de Senyè nou an, Jezi Kris.
9
Men, moun sa ki pa genyen bagay sa yo, li avèg, e li pa ka wè lwen, epi li bliye ke l te lave de ansyen peche l yo.
10
Poutèt sa, frè yo, pito nou fè efò pou nou fè ke e apèl nou an, e eleksyon nou an asire; paske, depi nou fè bagay sa yo, nou pa gendwa janm tonbe.
11
Avredi, se konsa ke yon pòt dantre ava osèvis nou ann abondans pou n antre nan wayòm etènèl Senyè e Sovè nou an, Jezi Kris.
12
Konsa donk, mwen p ap neglije pou m toujou fè nou sonje bagay sa yo, atout nou deja konnen yo, e ke nou kanpe fèm nan verite ki la kounye a.
13
Wi, mwen twouve sa rezonab, toutotan ke m nan tant sa a, pou mwen fè n souke kò nou pa mwayen rapèl bagay sa yo,
14
konesan ke talè konsa m ap blije kite tant mwen sa a, tankou ke Senyè nou an Jezi Kris te montre m li an.
15
Anplis de sa, mwen vle asire mwen ke apre lanmò m, nou va toujou kenbe bagay sa yo nan memwa nou.
16
Paske, se pa t istwa byen monte ke moun envante non ke nou te suiv lè ke nou te fè n konnen puisans e retou Senyè nou an Jezi Kris; men, nou te temwen majeste ke Li genyen an.
17
Paske, Li te resevwa onè ak glwa nan men Bondye Papa a, lè yon sèten vwa te pale avè L soti nan glwa ekselan an: Se Li menm ki Pitit Gason M ke Mwen jwenn anpil plezi nan Li a.
18
E, vwa sa a ki te soti nan syèl la, nou te tande l, lè nou te avèk Li sou mòn sakre a.
19
Epitou, nou gen yon Pawòl pwofesi ki plen asirans; kidonk, ou menm, ou byen fèt fè atansyon pou w gade l tankou yon lanp k ap klere nan fènwa, jouk jou a va parèt, e ke zetwal lematen an va leve nan kè w;
20
Toudabò, nou dwe konnen ke pa gen ankenn pwofesi nan Lekriti a ki gen entèpretasyon pèsonèl pou yon moun;
21
paske, nan tan lontan, pwofesi pa t vini pa mwayen volonte moun, men pito, se te de moun ki sen, moun pa Bondye, ki te pale dapre direksyon ke Lespri Sen an te ba yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!