Liv 2 Pyè
Chapit 2
Klike la pou koute lekti chapit sa1
Men, te gen fo pwofèt tou pami pèp la, menm jan ke va gen fo anseyan pami nou, se yo ki va pot vini yon kalite move doktrin, kote ke y ap menm rive nye Senyè ki te rachte yo a; e konsa, y ap rale yon destriksyon sibit sou tèt yo.
2
E, anpil moun va suiv bann chemen kwochi moun sa yo, se yo menm lan ki va lakòz ke chemen verite a denigre.
3
Lèfini, se atravè avaris yo wi, ke yo va vin ak pawòl mètdam pou eksplwate nou; se pa kounye a jijman menase moun sa yo non; e, kondanasyon yo a p ap ret dòmi.
4
Paske, si Bondye pa t fè pa zanj ki te peche yo, e ke okontrè se voye Li te voye jete yo anba nan lanfè, e Li te mete yo anba chenn tenèb lan, pouke yo ret la e tann jijman;
5
ansuiit, ke Li pa t fè pa ansyen monn lan, men, Li te sove Noye, yon nonm ki t ap preche lajistis, uityèm pami moun ki te sove yo, lè Li te voye delij nan sou lemonn moun ki san respè pou Bondye yo;
6
Epi ankò, Li te fè vil Sodòm ak Gomò yo tounen sann lè ke Li te kondane yo pou yo disparèt, kote ke Li te sèvi ak yo tankou egzanp pou moun apre yo ki va viv san respè pou Bondye,
7
e ke se Lot ase ke Li te delivre, misye ki te vekse poutèt konpòtman malpwòp mechan yo;
8
(avredi, nonm jis sa a te abite pami yo, e nan sa ke li t ap gade yo e ke l t ap tande yo, nanm li ki jis te toumante jou apre jou avèk zak ilegal moun sa yo.
9
Senyè a konnen kijan pou delivre moun ki gen devosyon pou Bondye yo anba tantasyon; e pou kenbe moun enjis yo la, jis rive nan jou jijman an pou yo ka pini;
10
men sitou, moun k ap mache dapre lachè nan move dezi sal yo, ak sila yo ki meprize otorite yo. Yo awogan konsa, yo tèti, yo pa pè pale diyitè ki nan syèl la mal.
11
Alòske zanj yo, ki gen plis pouvwa ak plis fòs, pa pote akizasyon kont yo pou denigre yo devan Senyè a.
12
Men moun sa yo, tankou bèt sovaj ki fèt pou yo kenbe yo, epi detwi yo; yo pale mal de bagay ke yo pa menm konprann; e yo va gen pou peri nan pwòp koripsyon yo a;
13
lèfini, yo va resevwa sa ke malfezans merite, kòm yo twouve ke se yon plezi pou y ap banboche gwo lajounen. Se moun ki gate e ki sal yo ye, yo vin ak tout mètdam yo pandan ke y ap fete ansanm avèk nou.
14
Je yo kale pou zak adiltè, e yo pa fouti sispann peche; y ap sedui nanm moun ki enstab, epi kè yo byen antrene nan aktivite fè ava; se pitit madichon yo ye!
15
Yo menm nan ki te kite chemen dwat la, epi ki te pèdi, ki t al suiv wout Balaam, pitit gason Bozò a, ki te renmen salè ke enjistis bay;
16
men, yo te pran bòt misye poutèt vyolasyon l nan, kote ke yon bourik bèbè te twouve pale ak vwa yon moun pou anpeche ke pwofèt la aji an moun fou.
17
Moun sa yo, se pi ki san dlo, se nyaj ke tanpèt pote ale; se pou yo ke anviwònman tenèb la rezève pou toutan.
18
Paske, lè y ap pale gwo pawòl ki gonfle ak vanite, se sedui y ap sedui pa mwayen move dezi lachè e pa mwayen libètinaj, yon seri moun ki te fenk chape anba sila yo ki t ap viv nan erè a.
19
Pandan y ap pwomèt moun yo libète a, yo menm, yo se esklav koripsyon; paske, nenpòt sa ki domine sou yon moun, se bagay sa a tou ki met moun sa a nan esklavaj.
20
Vrèmanvre, si apre ke yo ta fin chape anba salte ki nan monn nan, difèt ke yo te gen konesans de Jezi Kris, Senyè a e Sovè a, lèfini pou yo ta tounen al makònen ankò ladan l, epi li ta pote laviktwa sou yo; ebyen, dènye kondisyon an pi mal pou yo pase jan yo te kòmanse a.
21
Paske, li t ap pi bon pou yo ke yo pa t konnen chemen ladwati a, pase pou, apre ke yo te fin konnen l lan, yo vire do bay kòmandman sakre ki te transmèt ba yo a.
22
Men, sa ki rive yo a, li ann akò ak yon pwovèb ki vre: Chyen an tounen nan pwòp vomisman l ankò; e kochon ke yo fin lave a, retounen foure kò l nan labou a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!