Liv 2 Pyè
Chapit 3
Klike la pou koute lekti chapit sa1
Se dezyèm lèt, byenneme yo, ke mwen ekri ban nou; e se nan toulède ke, pa mwayen rapèl, mwen souke kò lespri entelijans nou ki pwòp;
2
dekwa pou nou ka kenbe nan memwa nou pawòl ki te pale anvan sa pa pwofèt sakre yo, ansanm ak kòmandman pa nou yo, nou menm apot Senyè a e Sovè a.
3
Konn sa premyèman, sèke nan dènye jou yo va gen pou vini yon kalite mokè k ap mache suiv pwòp move dezi yo,
4
epi k ap di konsa: Kote pwomès retou Li a fè? Paske depi zansèt yo fin mouri a, tout bagay kontinye tankou yo te ye depi kòmansman kreyasyon an.
5
Sa a, se ekspre yo fè, kòmsi yo pa konnen ke se pa mwayen Pawòl Bondye ke syèl yo te vin egziste nan tan lontan, ansanm ak latè a ki te soti kanpe pa deyò dlo a e nan dlo a,
6
kote ke lemon ki te la lè sa a, li te peri difèt ke l te anvayi ak dlo.
7
Men, syèl yo ak latè a ki la kounye a, se pa mwayen menm Pawòl la ke yo ret la, an rezèv pou dife kont moun ki san respè pou Bondye yo nan jou jijman ak pèdisyon yo a.
8
Men nou menm, byenneme, nou pa dwe pou n pa ta konn grenn bagay sa a, sèke ak Senyè a, yon jou se tankou mil an; e mil an, tankou yon jou.
9
Se pa trennen Senyè a ap trennen pye Li pou Li akonpli pwomès Li a, jan kèk moun kwè l la non; men pito, se pasyan Li pasyan anegad nou menm, difèt ke Li pa vle pou ankenn moun ta peri, men pou ke tout ta vin rive nan repantans.
10
Men, Jou Senyè a ap vini tankou yon vòlè lannuit; nan jou sa a, syèl yo va disparèt ak yon gwo bwi, epi tout matyè va fonn anba gwo chalè, konsa tou, latè ansanm ak travay ki te fèt nan li yo va kankannen.
11
Alò, palefèt ke n wè tout bagay sa yo gen pou fonn nan, ki sòt de moun nou ta dwe ye kanta yon konpòtman ki sen, e yon devosyon pou Bondye;
12
pandan ke nou ret ap tann e ke n ap prese pou jou Bondye a vini; jou kote syèl yo, difèt ke yo pran dife a, va gen pou yo tounen likid, e ke matyè yo va fonn anba gwo chalè a?
13
Tout jan, nou menm, dapre pwomès Li a, n ap tann nouvo syèl ak yon nouvo latè, kote ke ladwati ap abite.
14
Alèkile, byenneme, puiske n ap tann bagay sa yo, nou dwe fè ansòt pouke Li jwenn nou nan lapè, san tach, e san repwòch.
15
Epi, met nan tèt nou ke gran pasyans Senyè nou an se delivrans li ye; menm jan ke byenneme frè nou Pòl te ekri nou an dapre sajès ke li te resevwa a,
16
tankou tou ke l fè nan tout lèt li yo, kote ke nan yo l ap pale de yon seri bagay ki difisil pou konprann, ke moun inyoran ak sa ki enstab yo ap tòde sans bagay sa yo, menm jan ke yo fè l tou ak lòt Ekriti yo, pou destriksyon pwòp tèt yo.
17
Nou menm alò, byenneme, difèt ke nou konnen bagay sa yo davans, fè atansyon dekwa pou sa pa ta rive ke nou menm tou, erè moun deregle yo ta pote nou ale, epi nou ta sot tonbe nan jan ke nou te fèm nan.
18
Men, se pou nou grandi nan lagras, e nan konesans Jezi Kris, Senyè e Sovè nou an. Se Li ki gen laglwa, e kounye a, e pandan letènite. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!