Liv 1 Jan
Chapit 1
Klike la pou koute lekti chapit sa1
Sa ki te la depi okòmansman an, ke nou te tande a, ke nou te wè ak je nou an, ke nou te gade a, li konsène Pawòl lavi a.
2
Paske, lavi a te parèt aklè, e nou te wè li, e nou bay temwayaj de li, n ap anonse w lavi etènèl ki te avèk Papa a, epi ki te manifeste devan nou an.
3
Sa ke nou te wè e ke nou te tande a, n ap anonse w li dekwa pou ou menm tou, ou ka gen kominyon avèk nou; e, vrèmanvre, kominyon nou an se avèk Papa a, ak Pitit Gason Li a, Jezi Kris, ke l ye.
4
E, sa ke n ap ekri la a pou ou yo, se pou lajwa w ka plen nèt.
5
Men sa ki mesaj ke nou te tande Li di a, e ke n ap deklare w la: Sèke Bondye se limyè, e ke nan Li, nanpwen fènwa ditou!
6
Si nou di ke nou gen kominyon avèk Li, epi n ap mache nan fènwa, se manti n ap bay, e nou pa pratike laverite.
7
Men, si n ap mache nan limyè, menm jan ke Li menm Li nan limyè a, nou gen kominyon youn ak lòt, epi san Jezi Kris, Pitit Gason Li a, pirifye nou anba tout peche.
8
Si nou di nou pa gen peche, se tèt nou n ap twonpe, e laverite pa nan nou.
9
Si nou konfese peche nou yo, Li e fidèl, e jis pou padone peche nou yo, epitou, pou Li pirifye nou anba tout sa ki pa dwat.
10
Si nou di ke nou pa peche, nou fè L pase pou mantè, e Pawòl Li pa nan nou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!