Liv 1 Jan
Chapit 2
Klike la pou koute lekti chapit sa1
Timoun mwen yo, bagay sa yo m ap ekri nou yo, se pou nou pa peche. E si nenpòt moun peche, nou gen yon Avoka avèk Papa a: Jezi Kris ki Jis la.
2
E, se Li menm ki sakrifis entèsesyon pou peche nou yo; epi, se pa pou peche pa nou yo ase, mentou, se pou peche lemonn antye.
3
E, men kijan nou konnen ke nou konnen Li tout bonvre: se si nou kenbe kòmandman Li yo.
4
Yon moun ki di, mwen konnen Li, epi ki pa kenbe kòmandman Li yo, se yon mantè l ye, e, laverite pa nan li.
5
Men, nenpòt moun ki kenbe Pawòl Li, lanmou Bondye vin okonplè tout bonvre nan moun sa a; se konsa nou konnen ke nou nan Li.
6
Moun ki di ke li rete nan Li a, dwe pou mache menm jan ke Li menm Li te mache a.
7
Frè m yo, mwen p ap ekri okenn nouvo kòmandman ban nou, men se yon ansyen kòmandman nou te genyen depi okòmansman. Ansyen kòmandman sa a, se Pawòl nou te tande depi okòmansman an.
8
Epoutan, se yon nouvo kòmandman m ap ekri ban nou; se yon bagay ki vre e nan Li, e nan nou; paske fènwa a ap pase, e vre limyè a ap klere kounye a.
9
Yon moun ki di ke l nan limyè, epi ki rayi frè l, li nan fènwa jis kounye a.
10
Yon moun ki renmen frè l, li rete nan limyè a; e pa gen okenn okazyon chite lakay li.
11
Men yon moun ki rayi frè l, li nan fènwa, e l ap mache nan tenèb, li pa konn kote l prale, paske fènwa a fè l avèg nan je.
12
M ap ekri nou, timoun, paske peche nou yo padone pou byen non Li.
13
M ap ekri nou, papa yo, paske nou te vin konnen Sila ki te la depi okòmansman an. M ap ekri nou jennòm yo, paske nou gen laviktwa sou Mechan an. M ap ekri nou, timoun yo, paske nou te konn Papa a.
14
Mwen te ekri nou, nou menm papa yo, paske nou te vin konnen Sila a ki te la depi okòmansman an. Mwen te ekri nou, nou menm jennòm yo, paske nou gwonèg, e Pawòl Bondye a rete nan nou, epi nou te gen laviktwa sou Mechan an.
15
Pa renmen lemonn, nonplis tou bagay ki nan lemonn yo. Si nenpòt moun renmen lemonn, lanmou Papa a pa nan li.
16
Paske tout sa ki nan lemonn, dezi lachè, ak dezi je, epi ogèy nan lavi, pa soti kote Papa a, men yo soti nan lemonn.
17
E, lemonn ap pase ansanm ak dezi l yo; men, yon moun ki fè volonte Bondye ap rete la pou toutan.
18
Timoun, se dènye tan an, e kòm nou te tande ke Antekris la gen pou l vini, ebyen, depi kounye a, anpil antekris deja la; se sa ki fè nou konnen ke se dènye tan an.
19
Yo te soti ale kite nou, men, yo pa t avèk nou; paske si yo te avèk nou, pa gen dout ke yo t ap kontinye la avèk nou; men, y al deyò, dekwa pou sa ka klè ke se pa tout moun ki avèk nou.
20
Men nou menm, nou gen yon onksyon ki soti nan Sila ki Sen an, e nou konn tout bagay.
21
Mwen pa ekri nou poutèt nou pa konn laverite a non, men paske nou konnen l, e ke okenn manti pa ka soti nan laverite a.
22
Kilès ki se yon mantè, si se pa sila ki nye ke Jezi se Kris la? Li se yon antekris ki nye Papa a ak Pitit Gason an.
23
Nenpòt ki moun ki nye Pitit Gason an, moun sa a pa gen Papa a; men moun ki rekonèt Pitit Gason an, gen Papa a tou.
24
Alò, kite bagay sa yo rete nan nou, sa ke nou tande depi okòmansman yo. Si sa nou tande depi okòmansman yo rete nan nou, konsa, nou menm tou, nou va rete nan Pitit Gason an ak nan Papa a.
25
E, se pwomès sa a Li te pwomèt nou an: pwomès lavi etènèl la.
26
Bagay sa yo ke m ekri nou yo, yo konsène moun k ap twonpe nou yo.
27
Men, onksyon ke nou resevwa nan men Li an rete nan nou, e nou pa bezwen pyès moun anseye nou; men, menm onksyon an aprann nou tout bagay, e Li se laverite, e Li pa yon manti, e, menm jan Li te anseye nou an, se konsa tou nou dwe pou nou rete nan Li.
28
E kounye a, timoun, rete nan Li; pouke lè Li va parèt, nou ka gen konfyans, e ke nou pa wont lè Li vini an.
29
Si nou konnen ke Li jis, konsa, nou konnen tou, ke tout moun k ap fè sa ki jis, pran nesans nan Li.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!