Liv 1 Jan
Chapit 3
Klike la pou koute lekti chapit sa1
Gade ki kalite lanmou Papa a vide sou nou, jis pou yo rele nou pitit Bondye; se sa k fè lemonn pa konnen nou, paske yo pa konnen L nonplis.
2
Byenneme, kounye a, se pitit Bondye nou ye; e, sa nou pral ye a poko parèt; men nou konnen lè Li parèt, nou va menm jan ak Li, paske nou va wè Li jan Li ye a.
3
E, chak moun ki gen esperans sa a nan Li, pirifye tèt li, menm jan ke Li menm Li pi a.
4
Nenpòt moun ki komèt peche, li vyole lalwa a tou, paske peche se vyolasyon lalwa a.
5
E nou konnen ke Li te parèt pou Li wete peche nou yo, e nan Li, nanpwen peche.
6
Nenpòt moun ki rete nan Li, pa peche; nenpòt moun ki peche, pa t wè Li, ni l pa t konnen Li.
7
Timoun, pa kite okenn moun twonpe nou; moun k ap pratike ladwati, li dwat, menm jan ke Li menm Li dwat la.
8
Moun ki komèt peche se nan dyab la li soti; paske dyab la t ap peche depi okòmansman. Se pou rezon sa a ki fè Pitit Gason Bondye a te parèt tèt Li, pouke Li detwi zèv dyab la.
9
Nenpòt moun ki pran nesans nan Bondye pa komèt peche, paske semans Li a rete nan li, e li pa ka peche, paske li pran nesans nan Bondye.
10
Se konsa ke yo wè pitit Bondye yo, ak pitit dyab la; nenpòt moun ki pa pratike ladwati, pa soti nan Bondye; nitou, moun ki pa renmen frè li.
11
Paske, se mesaj sa a nou te tande depi okòmansman an, nou youn dwe renmen lòt.
12
Se pa menm jan ak Kayen, ki te soti nan Mechan an, epi ki te tiye frè l la. E, poukisa li te tiye l? Paske zèv li yo te move zèv, e ke zèv pa frè l la te zèv dwat.
13
Pa sezi, frè m yo, si lemonn rayi nou.
14
Nou konnen ke nou pase de lanmò a lavi, paske nou renmen frè yo. Moun ki pa renmen frè li rete nan lanmò.
15
Nenpòt ki moun ki rayi frè l, se yon asasen li ye; e nou konnen pa gen okenn asasen ki gen lavi etènèl nan li menm.
16
Men kouman nou vin konprann lanmou Bondye, paske Li te bay lavi L pou nou; e nou dwe bay lavi pa nou pou frè yo tou.
17
Men, si nenpòt moun ta gen byen nan monn sa a, epi li ta wè ke frè l nan bezwen, e ke l fèmen tout konpasyon ki anndan trip li pou frè a, kijan pou lanmou Bondye ta ka fè nan moun sa a menm?
18
Timoun mwen yo, se pa pou nou renmen ak pawòl ni ak langaj, men ak aksyon e ak laverite.
19
Se konsa nou konnen ke nou nan laverite a, e nou va bay kè nou, asirans devan Li.
20
Paske, si kè nou kondane nou, Bondye pi gran pase kè nou; e, Li konn tout bagay.
21
Byenneme, si kè nou pa kondane nou, alò, nou gen konfyans anegad Bondye.
22
E, nenpòt kisa nou mande, n ap resevwa l nan men Li, paske nou kenbe kòmandman Li yo, ansanm ak bagay sa yo ki jwenn plezi nan je Li.
23
E se sa ki kòmandman Li a, ke nou dwe kwè nan non Pitit Gason Li a, Jezi Kris, epi pou youn renmen lòt, tankou ke Li te kòmande nou an.
24
E, yon moun ki kenbe kòmandman Li yo, abite nan Bondye, e Bondye abite nan li. E se konsa nou konnen ke Li rete nan nou, gras a Lespri a ke Li ban nou an.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!