Liv 1 Jan
Chapit 4
Klike la pou koute lekti chapit sa1
Byenneme, pa kwè tout lespri, men teste lespri yo pou konnen si yo soti nan Bondye; paske anpil fo pwofèt soti al nan lemonn.
2
Men kouman nou konn Lespri Bondye a: tout lespri ki konfese ke Jezi Kris vini nan lachè nan lemonn, soti nan Bondye;
3
e, tout lespri ki pa konfese ke Jezi Kris vin nan lachè, pa soti nan Bondye; e se sa ki lespri Antekris la, ke nou tande ki gen pou vini an, e, ki depi kounye a gentan la nan lemonn.
4
Nou soti nan Bondye, timoun, e nou gen laviktwa sou yo, paske Sila ki nan nou an pi gran pase sila ki nan lemonn nan.
5
Yo sot nan lemonn, konsa, yo pale zafè lemonn, e lemonn koute yo.
6
Nou sot nan Bondye, moun ki konn Bondye koute nou, moun ki pa sot nan Bondye pa koute nou. Se konsa nou rekonèt Lespri laverite ak lespri manti a.
7
Byenneme, vin nou youn renmen lòt, paske lanmou soti nan Bondye, e tout moun ki pratike lanmou pran nesans nan Bondye, e yo konn Bondye.
8
Moun ki pa pratike lanmou, pa konn Bondye, paske Bondye se lanmou.
9
Se nan sa ke lanmou Bondye te manifeste anvè nou menm, paske Bondye voye sèl Pitit Gason ki pran nesans nan Li a nan lemonn, pou nou ka viv pa mwayen de Li menm.
10
Men kijan lanmou an ye, se pa ke nou te renmen Bondye, men sèke Li te renmen nou, e ke Li voye Pitit Gason Li a pou vin sakrifis entèsesyon pou peche nou yo.
11
Byenneme, si Bondye renmen nou nan pwen sa a, nou dwe nou menm tou, pou nou youn renmen lòt.
12
Pèsonn pa janm wè Bondye okenn lè. Si nou youn renmen lòt, Bondye abite nan nou, epi lanmou Li vin okonplè nan nou.
13
Men kijan ke nou konnen ke nou abite nan Li, e Li, nan nou: paske Li ban nou Lespri Li a.
14
E nou te wè, e nou temwaye ke Papa a te voye Pitit Gason an pou Li vin Sovè lemonn.
15
Nenpòt moun ki konfese ke Jezi se Pitit Gason Bondye, Bondye abite nan li, e li menm nan Bondye.
16
E nou te konnen e nou te kwè nan lanmou Bondye te genyen pou nou an. Bondye se lanmou, e moun ki rete nan lanmou, rete nan Bondye, e Bondye nan li.
17
Men kijan lanmou nou an ka okonplè, se pou nou gen fèm asirans nan Jou Jijman an; paske, jan ke Li ye a, se konsa tou nou ye nan lemonn.
18
Pa gen kè sote nan lanmou, men lanmou ki okonplè voye kè sote jete, difèt ke kè sote bay touman. Moun ki gen kè sote pa fèt nan lanmou ki okonplè.
19
Nou renmen Li paske Li te renmen nou anpremye.
20
Si yon moun di: mwen renmen Bondye, e ke l rayi frè l, li se yon mantè; paske moun sa a, ki pa renmen frè l ke li wè a, kouman pou l ta fè renmen Bondye ke li pa janm wè a?
21
E se kòmandman sa a nou genyen de Li, sèke yon moun ki renmen Bondye, dwe renmen frè l tou.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!