Liv 1 Jan
Chapit 5
Klike la pou koute lekti chapit sa1
Nenpòt moun ki kwè ke Jezi se Kris la, li pran nesans nan Bondye; e, tout moun ki kwè nan Sila ki anjandre a, dwe renmen Sila ke Li anjandre a tou.
2
Men kijan nou konnen ke nou renmen pitit Bondye yo, lè nou renmen Bondye, e ke n kenbe kòmandman Li yo.
3
Paske se sa ki lanmou Bondye a, pou nou kenbe kòmandman Li yo; e, kòmandman Li yo pa chay ki lou.
4
Paske nenpòt kisa ki pran nesans nan Bondye gen laviktwa sou lemonn; e laviktwa ki triyonfe sou lemonn nan, se lafwa nou.
5
Kilès moun ki triyonfe sou lemonn nan, si se pa moun ki kwè ke Jezi se Pitit Gason Bondye a?
6
Se Li ki vini pa mwayen dlo ak san an. Li menm, Jezi Kris, se pa sèlman pa mwayen dlo, men se pa mwayen dlo ak san. E, se Lespri a k ap bay temwayaj sa a, paske Lespri a se laverite.
7
Paske, gen twa k ap bay rapò nan syèl la: Papa a, Pawòl la, ak Lespri Sen an; e, twa sa yo se youn.
8
Epi, gen twa k ap bay temwayaj sou latè: Lespri a, dlo a, ak san an; e, yo toulètwa dakò tankou youn.
9
Si nou resevwa temwayaj lèzòm, temwayaj Bondye a pi gran, paske, se sa ki te temwayaj Bondye ke Li te rapòte sou Pitit Gason Li a.
10
Moun ki kwè nan Pitit Gason an, gen temwayaj la nan li menm; moun ki pa kwè Bondye, fè L tounen yon mantè, paske li pa kwè nan rapò ke Bondye bay sou Pitit Gason Li a.
11
E, men kisa rapò a ye, sèke Bondye te ban nou lavi etènèl, e ke lavi sa a, se nan Pitit Gason an li ye.
12
Moun ki gen Pitit Gason an, gen lavi; moun ki pa gen Pitit Gason an, pa gen lavi.
13
Bagay sa yo, mwen ekri yo ban nou menm ki kwè nan non Pitit Gason Bondye a, dekwa pou nou ka konnen ke nou gen lavi etènèl, e pou ke nou ka kontinye kwè nan non Pitit Gason Bondye a.
14
E se konfyans sa a nou genyen nan Li a: sèke, si nou mande nenpòt bagay ki ann akò ak volonte Li, Li tande nou.
15
E, si nou konnen ke Li tande nou, nenpòt sa ke nou mande, nou konnen ke nou gentan genyen demann sa ke nou te bezwen nan men L yo.
16
Si kenpòt moun ta wè frè li ap peche yon peche ki pa mennen nan lanmò, li va mande, e Li va ba li lavi pou sila k ap peche ki pa mennen nan lanmò yo. Genyen yon peche ki mennen nan lanmò; mwen pa di ke l dwe lapryè pou li.
17
Tousa ki pa dapre ladwati, se peche; e, gen yon peche ki pa mennen nan lanmò.
18
Nou konnen ke nenpòt moun ki pran nesans nan Bondye, pa peche; men, moun ke Bondye anjandre a, li kenbe tèt li, epi Mechan sa a pa ka touche l.
19
E, nou konnen ke nou soti nan Bondye, e ke lemonn antye kouche nan mechanste.
20
E, nou konnen ke Pitit Gason an vini; e Li ban nou yon bonkonprann pou nou kapab konnen Sila ki vre a; e, nou nan Sila ki vre a, nan Li menm, Pitit Gason Li a, Jezi Kris. Se Li ki vre Bondye a, e lavi etènèl la.
21
Timoun, veye tèt nou ak zidòl. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!