Liv Apokalips
Chapit 1
Klike la pou koute lekti chapit sa1
Revelasyon Jezi Kris la, ke Bondye te ba Li pou montre sèvitè L yo bagay ki gen pou rive talè konsa. E Li voye zanj Li, e Li sètifye revelasyon an bay Jan, sèvitè Li a.
2
Se Jan k ap rapòte Pawòl Bondye a, e temwayaj Jezi Kris la, ansanm ak tout bagay ke li te wè yo.
3
Se yon moun beni li ye, sila a ki li pawòl pwofesi sa a, e sila yo ki koute l, epi ki obsève bagay ki ekri ladan l yo, paske tan an pre rive.
4
Jan, a sèt legliz yo ki ann Azi a: Se pou gras tonbe sou nou, ak lapè ki soti kote Sila ki la a, ki te la a e k ap vini an; e kote sèt Lespri yo ki devan twòn Li an,
5
ak kote Jezi Kris, ki se Temwen Fidèl la, premye ki pran nesans pami mò yo, ki se Chèf wa sou latè yo. Sila ki te renmen nou e ki te lave nou anba peche nou yo nan pwòp san pa L;
6
e, ki te fè nou vin wa e sakrifikatè pou Bondye, e Papa Li; se pou Li resevwa glwa ak puisans pou toutan. Amèn.
7
Gade! L ap vini ak nyaj; e tout je va wè Li; e yo menm ki te pèse L yo tou; e tout nasyon sou latè va nan tristès poutèt Li. Se konsa menm! Amèn.
8
Mwen se Alfa ak Omega; kòmansman an ak finisman an; se sa Senyè a di, Li menm ki se Sila ki la a, ki te la a, e k ap gen pou vini an, Mwen se Toupuisan an.
9
Mwen menm Jan, ki se frè nou tou, e ki se konpànyon nou nan tribilasyon, ak nan wayòm nan, ak nan andirans Jezi Kris la; twouve ke m te sou zile ki rele Patmòs la, poutèt Pawòl Bondye a ak poutèt temwayaj Jezi Kris la.
10
Mwen te anba kontwòl Lespri a, nan jou Senyè a, epi m tande yon vwa byen fò dèyè do m, tankou son yon twonpèt;
11
li di m: Mwen se Alfa e Omega; premye a, e dènye a; li di: Sa w ap wè la a, ekri l nan yon liv, epi voye l bay sèt legliz yo ki ann Azi a: bay Efèz, bay Esmin, bay Pègam, bay Tiyati, bay Sad, bay Filadèlfi ak bay Lawodise.
12
Alò, mwen vire pou m wè vwa ki te pale avè m nan, e lè m vire, mwen wè sèt chandelye ann ò,
13
e nan mitan chandelye yo, te gen yon moun ki sanble ak Pitit Gason Lòm nan, ki te abiye ak yon rad long rive nan pye L, ak yon bandwòl ann ò kwaze sou lestomak Li.
14
Tèt Li ak cheve Li te blan tankou lenn, blan kou lanèj, e je L te tankou yon flanm dife;
15
e, pye L te sanble bwonz fen, kòmsi se boule yo t ap boule nan yon founèz dife, epi vwa Li te tankou son anpil dlo.
16
Epi, Li te gen sèt zetwal nan men dwat Li, e nan bouch Li, te gen yon epe de bò byen file ki te soti; e figi L te tankou solèy la lè l klere ak tout fòs li.
17
Lè m wè L, mwen tonbe nan pye L tankou w ta di yon mò; epi, li poze men dwat Li sou mwen, Li di m konsa: Ou pa bezwen pè. Mwen se premye a ak dènye a,
18
e Mwen se Sila ki vivan an, ki te mouri a; men gade! Mwen vivan pou toutan. Amèn. E, Mwen gen kle lanfè ak kle lanmò.
19
Ekri bagay ou sot wè yo, bagay ki la yo, ak bagay ki va vin apre yo:
20
mistè sèt zetwal yo ke w te wè nan men dwat Mwen an ak sèt chandelye ann ò yo. Sèt zetwal yo se zanj sèt legliz yo; epi, sèt chandelye ke w te wè yo se sèt legliz yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!