Liv Apokalips
Chapit 2
Klike la pou koute lekti chapit sa1
Bay zanj legliz nan Efèz la, ekri sa: Bagay sa yo, se Sila ki kenbe sèt zetwal yo nan men dwat Li a, e k ap mache nan mitan sèt chandelye ann ò yo ki di yo:
2
Mwen konn zèv ou yo, ak travay ou, e andirans ou; e jan w pa ka tolere moun ki malfezan yo, e ke w teste moun ki di se apot yo ye, men ki pa sa vre, e ou dekouvri ke se mantè yo ye.
3
Epitou, ou pèsevere, ou te gen pasyans, e ou te travay poutèt non Mwen, e ou pa t febli.
4
Sepandan, sa M gen kont ou, sèke ou kite premye lanmou w lan.
5
Kidonk, se pou w sonje kote w te soti pou w vin tonbe la a; epi, repanti, e fè premye travay yo; osinon, M ap vin pou ou byen vit, epi M ap wete chandelye w la nan plas li; eksepte si w repanti.
6
Men sa a, ou genyen l: Ou rayi zèv Nikolayis yo, sa ke Mwen rayi tou.
7
Moun ki gen zòrèy, se pou l tande sa Lespri a di legliz yo: Moun ki pote laviktwa a, M ap ba li manje nan pyebwa lavi a, ki nan mitan paradi Bondye a.
8
Epi, bay zanj legliz nan Esmin lan, ekri sa: Men sa Sila a ki premye a, e ki dènye a di, Li menm ki te mouri e ki vivan an:
9
Mwen konn travay ou yo, e tribilasyon w, ak jan w pòv (men ou rich); e, M konn blasfèm moun ki di se Juif yo ye a, e ki pa sa vre, alòske se sinagòg Satan yo ye.
10
Pa pè ankenn nan bagay ou pral sibi yo. Tande! Dyab la va lage kèk nan nou nan prizon pou yo ka teste nou; e, nou va sibi tribilasyon pandan dis jou; se pou nou fidèl jiska lamò; e konsa, Mwen va ban nou yon kouwòn lavi.
11
Moun ki gen zòrèy pou l tande, tande sa Lespri a di kongregasyon yo: Moun ki pote laviktwa a, p ap frape anba dezyèm lanmò a.
12
Ansuit, bay zanj legliz nan Pègam lan, ekri sa: Men sa Sila ki gen epe long byen file sou de bò a di:
13
Mwen konn travay ou yo, ak kote w rete a; se kote twòn Satan an ye a menm. Men, ou kenbe non Mwen fèm e ou pa nye lafwa M nan, menm nan jou kote Antipas ki te fidèl matirize M nan, ke yo te tiye pami nou an, kote Satan abite a.
14
Men, Mwen gen kèk bagay kont ou, paske ou gen moun la a k ap obsève ansèyman Balaam nan, ki te montre Balak kijan pou l poze yon pyè dachopman devan pitit Izrayèl yo pou fè yo manje bagay yo sakrifye bay zidòl e pou yo tonbe nan fònikasyon.
15
Se konsa tou ke w gen moun la a ki kenbe ansèyman Nikolayis yo, ki se yon bagay ke M rayi.
16
Repanti! Osinon, M ap vin pou ou byen vit; e M ap fè lagè kont yo ak epe ki nan bouch Mwen an.
17
Moun ki gen zòrèy, se pou l tande sa Lespri a di legliz yo: Moun ki gen laviktwa a, M ap ba l manje nan lamàn ki kache a, M ap ba l yon wòch blan, e nan wòch la, ap gen yon nouvo non ki ekri, ke pèsonn pa konnen, sof moun ki resevwa l la.
18
Apre sa, bay zanj legliz nan Tiyati a, ekri sa: Men sa Pitit Gason Bondye a di, Li menm je L tankou flanm dife a, e pye L tankou bwonz pirifye a:
19
Mwen konn travay ou yo, lanmou w, sèvis ou, lafwa w, ak pasyans ou; e, M konnen konsènan travay ou yo, ke dènye yo pi plis pase premye yo.
20
Malgre sa, Mwen gen kèk bagay kont ou, paske ou tolere fanm sa a yo rele Jezabèl la, li menm ki rele tèt li yon pwofetès, li menm k ap anseye e sedui sèvitè M yo pou yo tonbe nan fònikasyon e pou yo manje bagay yo sakrifye bay zidòl.
21
Alòske Mwen ba l tan pou l repanti pou fònikasyon l nan, men li pa repanti.
22
Gade! Mwen pral fè l ret kouche nan yon kabann; e, moun k ap komèt adiltè avè l yo, M ap lage yo nan yon gwo tribilasyon, amwenske yo repanti de zak yo komèt yo.
23
M ap detwi pitit li yo ak lanmò; konsa, tout legliz yo va konnen se Mwen menm ki sonde ren ak kè moun; e, M ap ban nou chak pa nou dapre zèv nou.
24
Men nou menm, ansanm ak rès moun ki nan Tiyati yo tou; tout moun ki pa obsève ansèyman sa a, nou menm ki pa konn bagay ki fon nan Satan yo, jan yo di l la; M ap di nou sa: Mwen p ap mete okenn lòt chay sou do nou.
25
Sèlman, sa nou genyen deja a, kenbe l fèm pou jis Mwen vini.
26
E konsa, moun ki gen laviktwa a, e ki kenbe travay Mwen yo jiska lafen an, se li menm M ap bay pouvwa sou nasyon yo;
27
e, li va gouvène sou yo ak yon baton an fè; e, se tankou veso ann ajil yon potye ke yo va kase an miyèt mòso; menm jan Mwen resevwa pouvwa nan men Papa M nan.
28
E M ap bay moun sa a etwal lematen an.
29
Moun ki gen zòrèy, se pou l tande sa Lespri a di legliz yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!