Liv Apokalips
Chapit 3
Klike la pou koute lekti chapit sa1
Epi, bay zanj legliz nan Sad la, ekri sa: Bagay sa yo, se Sila ki gen sèt Lespri Bondye yo ak sèt zetwal yo ki di yo: Mwen konn travay ou yo; ke w pote non kòmkwa w vivan, alòske ou mouri.
2
Fè atansyon, e fòtifye bagay ki rete yo, sa ki prèt pou mouri yo; paske Mwen pa twouve ke travay ou yo se travay ki alapèfeksyon devan Bondye.
3
Kidonk, sonje nan ki mànyè ke w te resevwa e ke w te tande; kenbe l fèm, epi repanti. Alèkile, sizoka ou pa ta veye, M ap vin sou ou tankou yon vòlè, e ou p ap konnen a kilè M ap rive sou ou a.
4
Men, ou gen non kèk moun nan Sad menm ki pa t sal rad yo; e yo va mache avè M toutan blan, paske yo merite l.
5
Moun ki gen laviktwa a, se li menm ki va abiye ak rad blan an; e Mwen p ap efase non l soti nan liv lavi a; men, M ap deklare non l devan Papa M e devan zanj Li yo.
6
Moun ki gen zòrèy, se pou l tande sa Lespri a di legliz yo.
7
Epi, bay zanj legliz nan Filadèlfi a, ekri sa: Bagay sa yo, se Sila a ki Sen an, Li menm ki vre a, ki gen kle David la, Li menm ki louvri e ke pèsonn pa ka fèmen an; epi, ki fèmen e ke pèsonn pa ka louvri a, se Li menm ki di yo:
8
Mwen konn travay ou yo; gade, Mwen met yon pòt tou louvri devan w, e pèsonn pa ka fèmen l; paske se yon ti fòs ke w genyen, e ou kenbe Pawòl Mwen an, epi ou pa t nye non Mwen.
9
Gade! M ap fè moun nan sinagòg Satan yo, k ap di se Juif yo ye a, alòske yo pa sa vre, men se manti y ap bay; gade, M ap fè yo vini pou yo ajenou nan pye w, e pou yo ka konnen ke M te renmen w.
10
Poutèt ou te kenbe Pawòl pèseverans Mwen an, M ap kenbe w tou nan moman tantasyon an, ki gen pou vini sou lemonn antye, e ki va teste moun yo ki abite sou latè a.
11
Gade! M ap vini tousuit; Kenbe sa w genyen an fèm, pou pèsonn pa pran kouwòn ou an.
12
Moun ki gen laviktwa a, se li menm M ap fè tounen yon poto nan tanp Bondye M nan, e li p ap soti ladan l ankò; epi, M ap ekri non Bondye M nan sou moun sa a, ansanm ak non vil Bondye M nan, ki se nouvo Jerizalèm nan, ki desann sot nan syèl la bò kote Bondye M nan; lèfini, M ap ekri nouvo non M nan sou li.
13
Moun ki gen zòrèy, se pou l tande sa Lespri a di legliz yo.
14
Epi, bay zanj legliz moun Lawodise yo, ekri sa: Bagay sa yo, se Sila ki Amèn nan, Sila ki Fidèl e Vre Temwen an, Sila ki kòmansman kreyasyon Bondye a, se Li menm ki di yo:
15
Mwen konn travay ou yo; ke w pa ni frèt, ni cho; Mwen ta pito ke w te swa cho, swa frèt.
16
Alèkile, difèt ke se tyèd ou tyèd, ke w pa ni cho, ni frèt la; Mwen pral vomi w sot nan bouch Mwen.
17
Poutèt w ap di: Mwen rich, mwen posede anpil byen, mwen pa bezwen anyen an; se konnen w pa konnen jan w malere, e mizerab, e pòv, e avèg, e toutouni.
18
M ap konseye w achte nan men M lò ki teste nan dife, pou w ka vin rich; ak rad blan pou w ka abiye, dekwa pou lawonte toutouni w lan pa parèt; epi, fwote je w ak pomad pou je, dekwa pou w ka wè.
19
Otan de moun ke M renmen, se otan ke Mwen fè obsèvasyon e Mwen korije; kidonk, se pou w devwe; epi, repanti!
20
Gade! Mwen kanpe nan papòt la, M ap frape. Si nenpòt moun ta tande vwa M, epi l ouvri pòt la, M ap antre jwenn li, M ap soupe avèk li, e li menm avèk Mwen.
21
Moun ki gen laviktwa a, M ap pèmèt li chita avè M sou twòn Mwen an; menm jan Mwen menm tou, Mwen te gen laviktwa a, e Mwen chita ak Papa M sou twòn Li an.
22
Moun ki gen zòrèy, se pou l tande sa Lespri a di legliz yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!