Liv Apokalips
Chapit 4
Klike la pou koute lekti chapit sa1
Apre sa, mwen gade, epi twouve te gen yon pòt ki louvri nan syèl la; epi, premye vwa ke m te tande a, ki tankou yon twonpèt la, pale avè m, li di: Monte vin isit la, e mwen pral montre w bagay yo ki gen pou rive apati de kounye a.
2
Epi, lamenm mwen transpòte nan lespri; epi gade, te gen yon twòn ki kanpe nan syèl la, e yon Moun te chita sou twòn nan.
3
E, Moun ki te chita a te sanble ak wòch jasp ak wòch sadwàn; e te gen yon lakansyèl toutotou twòn nan, ki te bay aparans ou ta di yon emwòd.
4
Epi, otou twòn nan, te gen vennkat fotèy; e, m te wè vennkat ansyen ki te chita; yo te abiye ak rad blan, e yo te gen kouwòn ann ò sou tèt yo.
5
Epi, anndan twòn nan te gen zèklè, loray ak vwa ki t ap soti; e te gen sèt lanp dife ki t ap boule devan twòn nan, ki se sèt Lespri Bondye yo.
6
Pa devan twòn nan te gen yon lanmè an vit ki te sanble ak kristal. E, nan mitan twòn nan ak toutotou twòn nan, te gen kat kreyati vivan ki te plen je devan kou dèyè.
7
Premye kreyati vivan an te sanble ak yon lyon; dezyèm kreyati vivan an te sanble ak yon towo bèf; twazyèm kreyati vivan an gen yon figi ki tankou figi moun; e, katriyèm kreyati vivan an te sanble ak yon èg k ap vole.
8
E, chak nan kat kreyati yo te gen sis zèl otou li; yo te chaje ak je nan yo. E, yo pa t sispann kit lajounen kit lannuit, yo t ap di: Li sen, Li sen, Li sen, Senyè Bondye Toupuisan an, Li menm ki te la a, ki la a, e k ap vini an!
9
Se konsa ke chak fwa kreyati vivan yo bay glwa, onè, ak remèsiman ba Sila ki chita sou twòn nan, ki vivan pou toutan e pou letènite a,
10
vennkat ansyen yo tonbe ajenou devan Sila ki te chita sou twòn nan, yo adore Sila ki vivan pou toutan e pou letènite a; epi, yo depoze kouwòn yo devan twòn nan, yo di:
11
Ou merite, O Senyè, pou W resevwa glwa, onè ak pouvwa, paske se Ou ki kreye tout bagay, e se volonte W ki fè yo la, e ki fè ke yo te kreye.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!