Liv Apokalips
Chapit 5
Klike la pou koute lekti chapit sa1
Ansuit, nan men dwat Sila ki chita sou twòn nan, mwen wè yon liv ki te ekri sou anndan ak sou deyò, e li te sele ak sèt sele.
2
Mwen wè yon zanj puisan ki t ap pwoklame ak yon vwa byen fò: Kiyès ki diy pou l louvri liv la, e kase sele sou li yo?
3
Men, pèsonn, kit nan syèl, kit sou latè, kit anba tè, pa t kapab louvri liv la, ni pou l ta gade anndan l.
4
Alò, mwen kriye anpil, poutèt yo pa t jwenn pèsonn ki diy pou louvri e li liv la, ni pou gade anndan l.
5
Alò, youn nan ansyen yo di m: Pa kriye; gade, Lyon tribi Jida a, rasin David la, Li te gen laviktwa pou Li louvi liv la, e kase sèt sele sou li yo.
6
Epi, mwen gade, mwen wè ke nan mitan twòn nan, kat kreyati vivan yo ak ansyen yo, te gen yon Ànyo ki sanble ke yo te tiye; Li te gen sèt kòn ak sèt je, ki se sèt Lespri Bondye yo ki te voye ale toupatou sou latè.
7
Ànyo a vini, Li pran liv la nan men dwat Sila ki te chita sou twòn nan.
8
Lè Ànyo a pran liv la, kat kreyati vivan yo ak vennkat ansyen yo tonbe ajenou devan Ànyo a; yo tout te gen hap, ak bòl ann ò ki plen pafen ki se lapriyè Sen yo.
9
Alèkile, yo chante yon nouvo chante ki di: Ou diy pou W pran liv la e pou W kase sele sou li yo, paske yo te tiye W; men, avèk san W, Ou rachte nou bay Bondye; nou menm ki soti nan tout tribi, nan tout lang, tout pèp ak tout nasyon;
10
epi, Ou fè nou vin wa ak sakrifikatè pou Bondye nou an; e, nou va reye sou latè.
11
Apre sa, mwen gade, m tande vwa yon bann zanj toutotou twòn nan, kreyati vivan yo ak ansyen yo; e kantite yo se te dimil fwa dimil, e milye pa milye.
12
Yo t ap di ak yon vwa byen fò: Ànyo a ke yo te tiye a diy pou Li resevwa pouvwa, ak richès, ak sajès, ak fòs, ak onè, ak glwa ak benediksyon.
13
Lè sa a, tout kreyati ki nan syèl la, ki sou latè a, ki anba tè, e sa yo ki nan lanmè, e tousa ki ladan yo, mwen tande y ap di: Benediksyon, ak onè, ak glwa ak pouvwa pou Sila ki chita sou twòn nan e pou Ànyo a pou toutan e pou letènite.
14
Epi, kat kreyati vivan yo di: Amèn! E vennkat ansyen yo tonbe ajenou, yo adore Sila ki vivan pou toutan e pou letènite a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!