Liv Apokalips
Chapit 7
Klike la pou koute lekti chapit sa1
Apre bagay sa yo, mwen wè kat zanj ki kanpe nan kat kwen latè a, yo te kenbe kat van latè yo, dekwa pou van pa soufle ni sou latè, ni sou lanmè, ni sou okenn pyebwa.
2
Epi, mwen wè yon lòt zanj ki t ap monte a lès; li te gen so Bondye vivan an; e, li rele ak yon vwa byen fò bay kat zanj ke yo te bay pouvwa fè latè a ak lanmè a mal yo,
3
li di: Pa fè ni latè, ni lanmè, ni pyebwa yo okenn mal, jis nou fin poze so sou fwon sèvitè Bondye nou an.
4
E mwen tande kantite moun yo te poze so sou yo a: Sankarannkatmil moun ki te soti nan tout tribi pitit Izrayèl yo.
5
Nan tribi Jida a so te poze sou douzmil; nan tribi Ribenn lan, so te poze sou douzmil; nan tribi Gad la, so te poze sou douzmil;
6
nan tribi Asè a, so te poze sou douzmil; nan tribi Naftali a, so te poze sou douzmil; nan tribi Manase a, so te poze sou douzmil;
7
nan tribi Simeyon an, so te poze sou douzmil; nan tribi Levi a, so te poze sou douzmil; nan tribi Isaka a, so te poze sou douzmil;
8
nan tribi Zabilon an, so te poze sou douzmil; nan tribi Jozèf la, so te poze sou douzmil; nan tribi Benjamen an, so te poze sou douzmil;
9
Apre sa, m gade, epi twouve se yon gwo foul ke okenn moun pa ta ka konte; yo te soti pami tout nasyon, e tribi, e pèp, e lang; yo te kanpe devan twòn nan, e devan Ànyo a, yo te abiye ak wòb blanch, e yo te gen fèy palmis kenbe nan men yo.
10
E, yo t ap rele byen fò, yo t ap di: Sali nanm lan, se Bondye nou an ki chita sou twòn nan, ak Ànyo a ki posede l!
11
Epi, tout zanj yo te kanpe fè wonn twòn nan ak bò ansyen yo, ak kat kreyati vivan yo; e, yo te tonbe ajenou sou fas devan twòn nan, e yo adore Bondye;
12
yo t ap di: Amèn! Benediksyon, ak glwa, ak sajès, ak remèsiman, ak onè, ak pouvwa, e ak fòs pou Bondye nou an pou toutan e pou letènite. Amèn.
13
Lè sa a, youn nan ansyen yo pran lapawòl, li di m konsa: Sila yo ki abiye ak wòb blanch yo, ki moun yo ye? E, ki bò yo soti?
14
Alò, mwen di li konsa: Mèt la, se ou menm ki konnen. Epi, li di m: Moun sa yo se moun ki soti anba gwo tribilasyon an; epi, yo lave wòb yo, e yo fè yo vin blanchi nan san Ànyo a.
15
Konsa donk, yo padevan twòn Bondye a, y ap sèvi L lajounen kou lannuit nan tanp Li an; e, Sila ki chita sou twòn nan va drese tant Li nan mitan yo.
16
Yo p ap ni grangou ankò, ni swaf ankò; nonplis, limyè solèy p ap frape yo, ni okenn chalè.
17
Paske, Ànyo a ki nan mitan twòn nan va nouri yo, e Li va mennen yo nan sous dlo lavi; e, Bondye va siye tout dlo nan je yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!