Liv Apokalips
Chapit 8
Klike la pou koute lekti chapit sa1
Epi, lè Ànyo a kase setyèm sele a, te gen silans nan syèl la pandan demi èdtan konsa.
2
Ansuit, mwen wè sèt zanj yo ki te kanpe devan Bondye a; e, yo te lonje sèt twonpèt ba yo.
3
Epi, gen yon lòt zanj ki parèt e ki kanpe bò lotèl la, li te kenbe yon ansanswa ann ò, e yo te ba li bon kou lansan, pou li te ofri l ak lapriyè tout Sen yo, sou lotèl ann ò a ki te padevan twòn nan.
4
E lafimen lansan an ki te vin avèk lapriyè Sen yo te soti nan men zanj lan, pou monte al devan Bondye.
5
Apre sa, zanj lan pran lansanswa a, li plen l ak dife ki te sou lotèl la, epi li lage l sou latè; alò, te vin gen vwa, kout loray, zèklè ak tranblemanntè.
6
Epi, sèt zanj yo ki te gen sèt twonpèt yo te pare kò yo pou yo sonnen.
7
Premye zanj lan sonnen; apre sa, vin gen lagrèl e dife melanje ak san; e yo lage yo sou latè; epi, yon tyè nan pyebwa yo te boule, e tout zèb vèt yo te boule.
8
Ansuit, dezyèm zanj lan sonnen; epi, se kòmsi se te yon gwo mòn ki t ap boule ak dife ke yo te lage nan lanmè a; epi, yon tyè nan lanmè a vin tounen san.
9
E, yon tyè nan kreyati ki t ap viv nan lanmè a te mouri; epi, yon tyè nan bato yo te peri.
10
Apre sa, twazyèm zanj lan sonnen; epi, yon gwo zetwal nan syèl la tonbe; li t ap boule tankou w ta di yon lanp, e li sot tonbe sou yon tyè nan rivyè yo ak sous dlo yo.
11
E non zetwal sa a se te Absent. Alò, yon tyè nan dlo yo te vin absent, e anpil moun te mouri akoz dlo sa yo, paske yo te vin anmè.
12
Epi, katriyèm zanj lan sonnen; e, yon tyè nan solèy la te frape, ak yon tyè nan lalin nan, ak yon tyè nan zetwal yo, dekwa pou yon tyè nan yo te nwasi, pouke pa gen limyè ki klere pandan yon tyè nan lajounen an; e pouke sa fèt menm jan an lannuit lan tou.
13
Mwen gade, e m tande yon zanj k ap vole nan mitan syèl la, e ki t ap di ak yon vwa byen fò: Malè, malè, malè pou moun ki abite sou latè a, akoz lòt kout twonpèt twa zanj yo ki poko sonnen yo!
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!