Liv Apokalips
Chapit 10
Klike la pou koute lekti chapit sa1
Apre sa, mwen wè yon lòt zanj puisan desann sot nan syèl la; li te abiye ak yon nyaj, e yon lakansyèl te anlè sou tèt li, epi figi l te tankou solèy la, e pye l te tankou pilye dife;
2
e, li te gen yon ti liv tou louvri nan men l. Li met pye dwat li sou lanmè a, e pye goch li sou latè a;
3
lèfini, li rele ak yon vwa byen fò, ou ta di lè yon lyon gwonde; e, lè l rele a, sèt loray fè tande vwa pa yo.
4
Alèkile, apre sèt loray yo te fè tande vwa yo a, mwen t apral ekri, men mwen tande yon vwa nan syèl la ki di m konsa: Poze sele sou pawòl sèt loray yo pwononse yo; e, pa ekri yo.
5
Epi, zanj mwen te wè ki te kanpe sou lanmè a ak sou latè a leve men li nan direksyon syèl la,
6
e li sèmante sou Sila ki vivan pou toutan e pou letènite a, ki te kreye syèl la ak sa ki ladan l yo, latè a ak sa ki ladan l yo, lanmè a ak sa ki ladan l yo, li di: Pa ta dwe gen tan ki rete ankò;
7
okontrè, nan jou yo kote vwa setyèm zanj lan pral vini an, lè li va kòmanse sonnen an, mistè Bondye a ap akonpli, jan ke Li te deklare l bay sèvitè Li yo, pwofèt yo.
8
Epi, vwa ke m tande soti nan syèl la pale avè m ankò, li di: Ale e pran ti liv ki tou louvri a nan men zanj ki kanpe sou lanmè a ak sou latè a.
9
Kidonk, m ale kot zanj lan, e mwen di l konsa: Ban m ti liv la. Li di m: Pran l, epi manje l nèt; l ap fè vant ou anmè; men nan bouch ou, l ap dous tankou siwo myèl.
10
Mwen pran ti liv la nan men zanj lan, mwen manje l nèt. Li te dous nan bouch mwen tankou siwo myèl; men, yonfwa m te fin manje l la, vant mwen te anmè.
11
Epi, li di m: W ap gen pou pwofetize ankò devan anpil pèp, ak nasyon, ak lang, e ak wa.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!