Liv Apokalips
Chapit 11
Klike la pou koute lekti chapit sa1
Ansuit, yo ban m yon wozo ki sanble ak yon baton; epi zanj lan kanpe, li di m: Leve, epi mezire tanp Bondye a, ak lotèl la, ak moun yo k ap adore anndan l nan.
2
Men, lakou ki padeyò tanp lan, kite l; pa mezire l, paske yo bay Payen yo li; e, vil sen an, yo pral pase l anba pye pandan karannde mwa.
3
E M ap bay de temwen Mwen yo pouvwa; e, yo va pwofetize pandan mildesanswasant jou, abiye ak twal sak.
4
Se yo ki de pye oliv ak de chandelye ki kanpe devan Bondye latè a.
5
E, si nenpòt moun vle fè yo mal, dife ap soti nan bouch yo, e l ap devore lènmi yo; depi nenpòt moun ta vle fè yo mal, se konsa y ap tiye l.
6
Yo gen pouvwa pou yo fèmen syèl la pou lapli pa tonbe pandan jou y ap pwofetize yo; yo gen pouvwa sou tout dlo pou fè yo tounen san; e pou yo frape latè avèk tout kalamite osisouvan ke yo vle.
7
Lè yo va fin bay temwayaj yo a, bèt ki te monte sot nan twou san fon an pral fè lagè kont yo, l ap pote laviktwa sou yo, e l ap tiye yo.
8
Epi, kadav yo pral ret nan lari gran vil la; ki spirityèlman rele Sodòm ak Ejip, se kote sa a tou Senyè nou an te krisifye a.
9
E, moun tout tribi, tout lang ak tout nasyon va wè kadav yo pandan twa jou edmi, e yo p ap pèmèt ke yo mete kadav yo nan tonm.
10
Konsa, moun ki abite sou latè a va rejwi poutèt kadav yo, yo va fete, e youn va voye kado bay lòt, paske de pwofèt sa yo te toumante moun ki abite sou latè a.
11
Men, apre twa jou edmi, Lespri lavi a ki sot nan Bondye antre nan yo; epi, yo kanpe sou pye yo; e yon gwo laperèz te tonbe sou moun ki te wè yo.
12
Epi, yo tande yon vwa byen fò ki soti nan syèl la ki di yo konsa: Monte vin isit la! Se konsa yo monte nan syèl nan yon nyaj; e lènmi yo t ap gade yo.
13
Epi, nan menm lè sa a, te gen yon gwo tranblemanntè; e, yon dizyèm nan pati lavil la tonbe, e nan tranblemanntè a, te gen sètmil moun ki mouri. Alò, rès moun yo te vin pè, e yo bay Bondye nan syèl la glwa.
14
Dezyèm malè a pase. Gade! Twazyèm malè a ap vin byen vit.
15
Epi, setyèm zanj lan sonnen, e te gen vwa nan syèl la ki t ap di byen fò: Wayòm lemonn yo vin tounen wayòm Senyè nou an ak Kris Li a; e, Li va reye pou toutan e pou letènite.
16
Alèkile, vennkat ansyen yo, ki chita sou fotèy yo devan Bondye a, tonbe fas atè, yo adore Bondye;
17
yo t ap di: Nou ba W remèsiman, O Senyè Bondye Toupuisan an, Sila ki la a, ki te la a, e k ap vini an; paske Ou pran gwo pouvwa W la nan men W, epi W ap reye.
18
Men, nasyon yo te fache; sepandan, kòlè W la vin rive, ak tan mò yo, pou yo ka jije; epitou pou W te ka bay rekonpans ba sèvitè W pwofèt yo, e bay Sen yo, ak sila ki gen krentif pou non W yo, kit piti kit gran, e pou W te ka detwi moun yo ki t ap detwi latè a.
19
Lè sa a, tanp Bondye a te louvri nan syèl la, e yo te wè lach alyans Li a anndan tanp Li a. Alò, te vin gen zèklè, ak vwa, ak loray, ak yon tranblemanntè, e gwo lagrèl.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!