Liv Apokalips
Chapit 13
Klike la pou koute lekti chapit sa1
Apre sa, mwen te kanpe sou sab lanmè a, epi mwen wè yon bèt leve sot nan lanmè a; li te gen sèt tèt ak dis kòn; e, sou dis kòn yo te gen dis kouwòn; e, sou sèt tèt li yo te gen non blasfèm nan.
2
E, bèt ke m te wè a te sanble ak yon leyopa; e, pye l te te tankou pye yon lous; e bouch li, tankou bouch lyon. Epi, dragon an te ba li puisans li a, e twòn li an, avèk gwo otorite.
3
Ansuit, mwen wè youn nan tèt li yo kòmsi ki te blese amò; epi, blese amò a te geri; alò, lemonn antye te nan admirasyon pou bèt la.
4
Anplis de sa, yo te adore dragon an ki te lage pouvwa nan men bèt la; lèfini, yo t ap adore bèt la, yo t ap di: Kiyès ki konparab ak bèt la? Kiyès ki ka fè lagè avè l?
5
Ansuit, yo te bay bèt la yon bouch ki t ap di yon kalite gwo pawòl ak yon bann blasfèm; yo te ba l pouvwa tou pou li kontinye pandan karannde mwa.
6
Kidonk, li louvri bouch li ak blasfèm kont Bondye; pou blasfeme non Bondye, ak tabènak Li a, ansanm ak sila yo ki abite nan syèl la.
7
Konsa, yo te ba l pouvwa pou li te fè lagè ak Sen yo, e pou l gen laviktwa sou yo; epi, yo te ba l pouvwa sou tout tribi, tout lang, e tout nasyon.
8
E, tout moun ki abite sou latè va adore l; sila yo ke non yo pa ekri nan liv lavi Ànyo a ki te sakrifye depi nan kreyasyon lemonn nan.
9
Si yon moun gen zòrèy, se pou l tande.
10
Moun ki kondui lòt nan prizon, va gen pou l al nan prizon; moun ki tiye ak epe, fòk yo tiye l ak epe. Se sa ki pasyans ak lafwa Sen yo.
11
Lè sa a, mwen gade m wè yon lòt bèt leve soti nan latè; e, li te gen de kòn sanble ak kòn yon ànyo; li te pale tankou yon dragon.
12
E, li te egzèse tout pouvwa premye bèt la devan li; epi, li te lakòz ke latè ak sila yo ki abite sou latè a adore premye bèt ke blese amò l la te geri a.
13
Alèkile, li t ap fè gwo mèvèy, rive menm pou l fè dife sot nan syèl desann sou latè devan je lèzòm.
14
Se konsa ke l te twonpe sila yo ki te abite sou latè a, pa mwayen mirak sa yo ke l te gen pouvwa pou l fè devan je bèt la; li t ap di sila yo ki abite sou latè a, se pou yo fè yon imaj pou bèt la ki te blese ak epe a, epi ki te viv la.
15
Anplis, li te gen pouvwa pou l bay imaj bèt la lavi, pouke imaj bèt la te ka alafwa pale, e lakòz ke yo te tiye otan de moun ki pa t adore imaj bèt la.
16
Epi, li fè ansòt ke tout moun, kit sa k piti, kit sa k gran, sa k rich, sa k pòv, sa k lib, sa k esklav, resevwa yon mak nan men dwat yo, oswa nan fwon yo;
17
e, ke pèsonn pa kapab achte oubyen vann, eksepte moun ki te gen mak la, oswa non bèt la, oswa nimewo non bèt la.
18
Men sa ki sajès: Se pou moun ki gen bonkonprann konte nimewo bèt la; paske se nimewo yon moun li ye; e, nimewo l la se sisanswasantsis.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!