Liv Apokalips
Chapit 14
Klike la pou koute lekti chapit sa1
Ansuit, mwen gade, epi men li, yon Ànyo te kanpe sou Mòn Siyon an; e, avèk Li te gen sankarantkatmil moun ki te gen non Papa L ekri nan fwon yo.
2
Epi, m tande yon vwa sot nan syèl la, ou ta di anpil rivyè dlo, e kòmsi se ta bwi yon gwo loraj; apre sa, m tande son jwè hap k ap jwe hap yo;
3
e, yo t ap chante kòmsi se te yon nouvo chante devan twòn nan, e devan kat kreyati yo, ak ansyen yo; e, okenn moun pa t ka aprann chante sa apa de sankarantkatmil yo ki te rachte yo sou latè a.
4
Moun sa yo, se yo menm ki pa t sal tèt yo ak fi, paske yo vièj. Moun sa yo, se moun ki swiv Ànyo a kenpòt kote L ale. Moun sa yo, se moun ki te rachte pami lèzòm, difèt ke se premye fwi yo ye pou Bondye e pou Ànyo a.
5
E, nan bouch yo, pa t gen okenn twonpri; paske yo te san fot devan twòn Bondye a.
6
Epi, mwen wè yon lòt zanj vole nan mitan syèl la, ki te gen levanjil etènèl la pou l preche bay sila yo ki abite sou latè a, bay chak nasyon, chak tribi, chak lang, ak chak pèp;
7
li t ap di ak yon vwa byen fò: Gen krentif pou Bondye, e ba Li glwa, paske lè jijman L lan rive; alò, adore Sila ki kreye syèl, ak latè, ak lanmè a, e sous dlo yo.
8
Epi, te gen yon lòt zanj ki vin apre, li di: Babilòn tonbe, li tonbe! Gran vil sa a; poutèt li te fè tout nasyon yo bwè nan diven anraje fònikasyon l lan.
9
Ansuit, twazyèm zanj lan suiv yo, li t ap di ak yon vwa byen fò: Si nenpòt moun adore bèt la ak imaj bèt la, e resevwa mak li a nan fwon l oswa nan men l,
10
moun sa a va gen pou l bwè nan diven kòlè Bondye a, ki vide san dekoupe nan gode endiyasyon L lan; e, moun sa a va toumante avèk dife ak souf nan prezans zanj ki sen yo, e nan prezans Ànyo a;
11
e konsa, lafimen touman yo a ap monte pou letènite, e yo p ap gen okenn repo lajounen ni lannuit; sa se pou moun yo ki adore bèt la ak imaj li a; epi, nenpòt kiyès ki resevwa mak non bèt la.
12
Men sa ki pasyans Sen yo; se moun ki kenbe kòmandman Bondye yo, ak lafwa Jezi a.
13
Apre sa, mwen tande yon vwa ki sot nan syèl la di m konsa: Ekri: Se moun beni yo ye, mò yo ki mouri nan Senyè a apati kounye a. Lespri a di: se vre wi; yo mèt repoze nan travay yo t ap fè yo; e zèv yo va suiv yo.
14
Epi m gade, e twouve se te yon nyaj blan; epi, te gen yon moun chita sou nyaj la ki sanble ak Pitit Gason Lòm nan, Li te gen yon kouwòn ann ò sou tèt Li, e Li te gen yon sèpèt file nan men L.
15
Lè sa a, yon lòt zanj soti nan tanp lan, li t ap rele ak yon vwa byen fò pou di Sila ki te chita sou nyaj la: Voye sèpèt Ou a ale, epi rekòlte; paske, lè a rive pou W rekòlte; poutèt rekòt latè a fin mi.
16
Alèkile, Sila ki chita sou nyaj la voye sèpèt Li a ale sou latè; e, rekòt latè a te fèt.
17
Epi, yon lòt zanj soti nan tanp ki nan syèl la; li menm tou, li te gen yon sèpèt file.
18
Lè sa a, yon lòt zanj soti nan lotèl la; li te gen pouvwa sou dife; epi, li rele ak yon vwa byen fò pou pale ak sa ki te gen sèpèt file a, li di: Voye sèpèt ou a ale, epi ranmase grap nan pye rezen latè yo; paske rezen l yo fin mi nèt.
19
Konsa, zanj lan voye sèpèt li a ale sou latè, epi li keyi rezen latè yo; epi, li lage l nan gwo basen près rezen kòlè Bondye a.
20
Yo pase près la padeyò lavil la; e, san te soti nan près la, jis rive nan brid ki te nan bouch cheval yo, sou yon distans milsissan estad.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!