Liv Apokalips
Chapit 16
Klike la pou koute lekti chapit sa1
Ansuit, mwen tande yon gwo vwa soti nan tanp lan, ki di sèt zanj yo: Ale nan wout nou; epi, vide bòl kòlè Bondye yo sou latè.
2
Konsa donk, premye a ale, e li vide bòl pa l la sou latè; epi, yon move kalite maleng ki fè mal, leve sou moun yo ki te gen mak bèt la, ak sou sa yo ki te adore imaj li a.
3
Epi, dezyèm zanj lan vide bòl pa l la nan lanmè a; e, li te vin tounen tankou san yon moun mouri; alò, tout bèt vivan nan lanmè mouri.
4
Apre, se te twazyèm zanj lan ki vide bòl pa l la nan rivyè ak nan sous dlo yo; e, yo vin tounen san.
5
Lè sa a, mwen tande zanj lan ki zanj dlo yo di: Ou dwat, O Senyè, Ou menm ki te la a, ki la a, e k ap la a, difèt ke W jije nan fason sa a.
6
Paske, yo te fè san Sen yo ak pwofèt yo koule; konsa, Ou ba yo san pou yo bwè; paske yo merite l.
7
Epi, m tande yon lòt vwa ki soti nan lotèl la di: Se sa menm, Senyè Bondye Toupuisan an, jijman W yo vre, e yo dwat.
8
Lè sa a, katryèm zanj lan vide bòl pa l la sou solèy la; e, yo te ba l pouvwa pou li boule lèzòm ak dife.
9
E, lèzòm t ap boule anba gwo chalè; alò, yo pran blasfeme non Bondye, Li menm ki te gen pouvwa sou kalamite sa yo; kidonk, yo pa t repanti pou yo ta ba Li glwa.
10
Ansuit, senkyèm zanj lan vide bòl pa l la sou twòn bèt la; epi, wayòm li an te anvayi ak tenèb; e, yo mòde lang yo anba doulè;
11
e, yo blasfeme Bondye nan syèl la poutèt doulè yo t ap soufri yo ak maleng yo te genyen yo; sepandan, yo pa t repanti de zèv yo te komèt yo.
12
Epi, sizyèm zanj lan vide bòl pa l la nan gran rivyè Efrat la; epi, dlo rivyè a seche, dekwa pou chemen wa yo k ap soti a lès la ka prepare.
13
Alò, mwen wè twa lespri malsen, ou ta di krapo, yo te soti nan bouch dragon an, ak nan bouch bèt la, e ak nan bouch fo pwofèt la.
14
Avrèdi, yo se lespri dyab k ap fè mirak, yo pral ale kote wa sou latè yo nan lemonn antye, e y ap rasanble yo pou batay gran jou sa a, jou Bondye Toupuisan an.
15
Gade non! M ap vini tankou yon vòlè. Se yon moun beni li ye, sila ki rete ap veye a; epi, ki ret ak rad sou li, pou sa pa rive ke l ta mache toutouni, epi yo ta wè lawonte l.
16
Apre sa, li reyini yo ansanm nan yon kote ki rele Amagedon nan lang Ebre.
17
Ansuit, setyèm zanj lan vide bòl pa l la nan lè a; alò, gen yon gwo vwa ki soti nan tanp syèl la, nan twòn lan, li di: Se fini!
18
Epi, se te vwa, kout loraj, ak zèklè ki te genyen; anplis, te gen yon gwo tranblemanntè; pa t janm gen kalite tranblemanntè konsa depi lèzòm ap viv sou latè, tèlman tranblemanntè a te gen fòs, tèlman li te gwo.
19
Alèkile, gran vil la te separe an twa pati; e, vil ki nan nasyon yo tonbe; e lè sa a, gran Babilòn te vin devan nan memwa Bondye pou Li te ba l gode diven tout fòs kòlè L la.
20
Se konsa, tout zile yo kouri ale; e, ou pa t ka jwenn mòn yo.
21
Lèfini, te vin gen gwo lagrèl ki t ap tonbe sou lèzòm; chak grenn te peze yon talan konsa; e, lèzòm t ap blasfeme Bondye poutèt kalamite lagrèl la, paske gwosè kalamite sa a te depase mezi.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!