Liv Apokalips
Chapit 17
Klike la pou koute lekti chapit sa1
Apre sa, gen youn nan sèt zanj ki te gen sèt bòl yo, ki vin pale avè m, li di m konsa: Vin isit; mwen pral montre w jijman gwo pwostitye a ki chita sou plizyè dlo yo;
2
se avè l ke wa sou latè yo t ap komèt fònikasyon, e se li ki lakòz moun yo ki abite sou latè a vin sou ak diven fònikasyon l lan.
3
Kidonk, li mennen m ale nan dezè a; epi, mwen wè yon fanm ki te chita sou yon bèt koulè wouj vif, ki te plen ak non blasfèm sou li, e ki te gen sèt tèt ak dis kòn.
4
E, fanm nan menm te abiye an mov ak an wouj vif; epi, kò l te òne ak lò, pyè presye, ak pèl; e, li te kenbe yon koup ann ò nan men l, ki te plen abominasyon ak salte fònikasyon li a.
5
Epi, sou fwon li, te gen yon non ki te ekri: MISTÈ, BABILÒN KI GRAN AN, MANMAN PWOSTITYE YO AK ABOMINASYON YO SOU LATÈ A.
6
Se konsa, mwen wè fanm nan te sou avèk san sen yo, e avèk san mati Jezi yo. Epi, lè m wè l la, mwen te ret bouch be ak yon gwo sezisman.
7
Alò, zanj lan di m konsa: Poukisa w sezi a? Mwen pral rakonte w mistè fanm nan, ak bèt k ap pote l sou do l la, ki gen sèt tèt ak dis kòn lan.
8
Bèt la ou wè a te la; e, li pa la; men, li va leve soti nan twou san fon an, lèfini pou l peri. E, moun yo ki abite sou latè yo, sila ke non yo pa ekri nan liv lavi a depi nan kreyasyon monn nan, yo va sezi lè yo gade bèt la ki te la a, ki pa la a, men ki la toujou a.
9
E, men lespri a ki gen sajès la. Sèt tèt yo se sèt mòn yo ye; se sou yo ke fanm nan chita.
10
Epi, gen sèt wa; senk nan yo tonbe, gen youn ki la, e, lòt la poko vini; e, lè l vini, fòk li rete pou yon ti moman.
11
Konsa, bèt ki te la a, epi ki pa la a, se li menm ki uityèm lan, e li te pami sèt yo, epi l al peri.
12
Ansuit, dis kòn yo w te wè a, se dis wa yo ye; yo poko resevwa wayòm kounye a; men, y ap gen pou resevwa pouvwa kòm wa pou inèdtan avèk bèt la.
13
Yo menm, se yon sèl lide a yo genyen, e yo va bay pouvwa yo ak fòs yo bay bèt la.
14
Se yo menm ki va fè lagè ak Ànyo a; e, Ànyo a va gen laviktwa sou yo; paske Li se Senyè dè senyè, Li se Wa dè wa; e, sila ki avèk Li yo, yo se moun ki aple, yo se moun ki chwazi, e yo se moun ki fidèl.
15
Epi, li di m konsa: Dlo yo w te wè a, kote pwostitye a chita a, se pèp, ak foul moun, ak nasyon, ak lang.
16
E, dis kòn yo w te wè sou bèt la, yo va rayi pwostitye a, e yo va depafini l, yo va mete l toutouni, e yo va devore chè l, e boule l ak dife.
17
Paske, Bondye te met nan kè yo pou fè volonte Li, e pouke yo te dakò, e bay bèt la wayòm pa yo, jiskaske pawòl Bondye yo fin akonpli.
18
E, fanm nan w te wè a, se gran vil sa a, ki t ap reye sou tèt wa yo sou latè a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!