Liv Apokalips
Chapit 18
Klike la pou koute lekti chapit sa1
E, apre bagay sa yo, mwen wè yon lòt zanj desann sot nan syèl; li te gen gwo pouvwa, e latè te klere ak glwa li.
2
Epi, li rele byen fò avèk yon gwo vwa, li di: Babilòn ki gran an tonbe, li tonbe; e, li vin tounen abitasyon dyab yo, plas kote lespri sansal yo rete, kaj ki kenbe tout zwazo malsen e rayisab yo.
3
Paske, tout nasyon yo te bwè nan diven kòlè fònikasyon l lan; e, wa sou latè yo komèt fònikasyon avè l; konsa tou, komèsan sou latè yo te fin rich atravè depans san mezi li fè nan jan l renmen liks.
4
Epi, mwen tande yon lòt vwa ki sot nan syèl la, li di: Soti nan mitan l, pèp Mwen an, pou w pa patisipe nan peche l yo; e, pou w pa resevwa nan kalamite l yo.
5
Paske, peche li yo rive jis nan syèl; e, Bondye sonje inikite l yo.
6
Ba l rekonpans menm jan l te bay rekonpans lan; epi, remèt de fwa valè dapre travay li te fè yo; nan gode ke l te plen an, vide de fwa plis pou li.
7
Pou depi tan li t ap glorifye tèt li a, e ke l t ap mennen lavi dous la; se menm tan an pou ba l touman ak lapenn; paske l t ap di nan kè l: Mwen chita tankou rèn; mwen pa vèv pyès; e, mwen p ap konn okenn lapenn.
8
Alò, kalamite l yo va rive nan yon sèl jou; lanmò, ak dèy ak grangou; e, li va boule nèt ak dife; paske Senyè Bondye a k ap jije l la puisan.
9
Lè sa a, wa sou latè yo ki t ap komèt fònikasyon e t ap mennen lavi dous avèk li yo, va rele anmwe pou li, e kriye pou li, lè yo va wè lafimen dife l la.
10
Yo va kanpe de lwen, akòz pè yo pè touman l lan, yo va di: Elas, elas, pou Babilòn, gran vil sa a; kokenn chenn vil sa a; twouve nan inèdtan jijman w rive sou ou.
11
Alèkile, komèsan sou latè yo va kriye, yo va andèy pou li; paske pèsonn pa achte machandiz nan men yo ankò.
12
Machandiz ann ò, ak ann ajan, ak an pyè presye, ak an pèl, ak twal len fen, ak twal poup, ak twal swa, ak twal wouj vif, avèk tout bwa santi bon, ak tout kalite veso ann ivwa, ak tout kalite mèb an bwa presye, ak veso an bwonz, an fè, an mab,
13
e ak kanèl, ak pafen, ak pomad lami, ak lansan, ak diven, ak luil, ak farin fen, ak ble, ak bèt, ak mouton, ak cheval, ak charyo, ak esklav, ak nanm moun.
14
Konsa, fwi yo ke nanm ou t ap rapousiv ak lanvi a, yo pati al kite w; tout bagay gwo valè yo, ekstravagan yo, yo pati al kite w, e ou pa gendwa janm jwenn yo ankò ditou.
15
Komèsan machandiz sa yo ke li te fè rich yo, yo va ret kanpe de lwen, akòz pè yo pè touman l lan, pou yo kriye, pou yo rele anmwe;
16
y ap di: Elas, elas pou gran vil sa a ki te konn abiye ak twal len fen an, ak twal poup lan, ak twal wouj vif lan; ki te konn òne kò l ak lò, ak pyè presye, e avèk pèl!
17
Twouve nan inèdtan, tout gwo richès sa yo vin detwi. E, se konsa ke chak kaptenn batiman, ak tout pasaje sou bato yo, ak maren yo, e ak mezi moun ki fè komès sou lanmè, yo tout kanpe de lwen;
18
e, yo kriye lè yo wè lafimen dife li a, yo di: Ki vil ki ka konpare ak gran vil sa a?
19
Alèkile, yo simen pousyè sou tèt yo, epi yo kriye, yo rele anmwe, yo pran dèy, yo di: Elas, elas pou gran vil sa a kote tout moun ki gen bato sou lanmè te fè richès yo poutèt lajès li nan depanse lajan! Twouve nan inèdtan, li detwi nèt ale.
20
Rejwi sou tèt li, ou menm syèl, e nou menm apot ki sen yo ak pwofèt yo; paske, Bondye pran revanj pou nou kont li.
21
Epi, yon zanj puisan pran yon wòch, tankou yon gwo wòch moulen, e li voye l jete nan lanmè a, li di: Se ak vyolans konsa ke yo va voye gran vil Babilòn sa a jete; e, yo pa gendwa janm jwenn li ditou ankò.
22
Anplis de sa, son enstriman hap, ak mizisyen, ak flit, ak twonpèt, yo p ap tande sa lakay ou ditou ankò; e, okenn atizan, kèlkeswa metye l fè a, yo p ap jwenn li lakay ou ankò; e, bwi moulen, yo p ap tande sa lakay ou ditou ankò;
23
epi, limyè bouji pa gendwa janm klere lakay ou ankò; e, vwa lemarye ak lamarye, yo p ap janm tande sa lakay ou ankò; paske, se komèsan w yo ki te milyonè sou latè; e, paske se maji w yo ki te lakòz tout nasyon yo sedui.
24
E, se lakay li ke yo te jwenn san pwofèt ak san Sen yo, e ak san tout moun yo te tiye sou latè yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!