Liv Apokalips
Chapit 19
Klike la pou koute lekti chapit sa1
Apre bagay sa yo, mwen tande bwi vwa anpil moun nan syèl la, k ap di: Alelouya! Sali nanm moun, ak glwa, ak onè, ak pouvwa, se pou Senyè Bondye nou an yo ye!
2
Paske, jijman L yo vre e yo dwat; paske, Li jije gran pwostitye a, ki te pèvèti lemonn ak fònikasyon li a; e, Li vanje san sèvitè L yo ki te koule anba men l yo.
3
Epi, yon lòt fwa ankò yo di: Alelouya! E se konsa, lafimen l lan monte pou toutan e pou letènite.
4
Lè sa a, vennkat ansyen yo ak kat kreyati yo tonbe atè pou yo adore Bondye ki chita sou twòn nan, yo t ap di: Amen; Alelouya!
5
Epi, yon vwa soti nan twòn nan, li di: Louwe Bondye nou an, nou tout sèvitè L yo, e nou menm yo ki gen krentif pou Li, kit sila ki piti, kit sila ki gran.
6
Ansuit, mwen tande tankou w ta di vwa yon foul moun, ak tankou bwi anpil dlo rivyè, ak tankou bwi gwo kout loraj, ki t ap di: Alelouya! Paske Senyè Bondye omnipotan an ap reye!
7
Se pou nou kontan, se pou nou rejwi; e, pou nou ba Li onè; paske maryaj Ànyo a rive, e madanm Li pare tèt li.
8
E, yo pèmèt madanm Li an pou l abiye ak twal len fen ki pwòp e blan; paske twal len fen an se dwati Sen yo li ye.
9
Epi, li di m konsa: Ekri sa: Se moun beni yo ye, sila yo ke yo envite nan resepsyon maryaj Ànyo a. Ansuit, li di m konsa: Sa yo, se vre pawòl Bondye yo ye!
10
Alò, mwen tonbe nan pye l pou m adore li. Lè sa a, li di m konsa: Se pa bagay pou w fè; mwen se sèvitè menm jan avè w, e parèy ak frè w yo ki kenbe temwayaj Jezi a. Se Bondye pou w adore! Paske, temwayaj Jezi a, se lespri pwofesi.
11
E, mwen wè syèl la louvri, epi gade, se te yon cheval blan; e, Sila ki te chita sou li a te rele Fidèl e Vre; e, se dapre ladwati ke L jije e ke L fè lagè.
12
Je L yo te tankou flanm dife; e, Li te gen plizyè kouwòn sou tèt Li; konsa tou, Li te gen yon non ki te ekri, ke pèsonn pa t konnen, sof Li menm.
13
E, Li te abiye ak yon rad ki tranpe nan san; epi, non Li te rele: Pawòl Bondye a!
14
E, lame yo ki te nan syèl la t ap suiv Li sou cheval blan, yo te abiye ak twal len fen, blan e pwòp.
15
E, lonje soti nan bouch Li, te gen yon epe byen file, pouke Li frape nasyon avè l; konsa, Li va gouvène yo ak yon baton an fè; e, L ap woule près rezen kòlè debòde Bondye Toupuisan an.
16
E, Li te gen yon non ki te ekri sou rad Li e sou kuis Li: WA DÈ WA, E SENYÈ DÈ SENYÈ.
17
Apre sa, mwen wè yon zanj ki kanpe nan solèy la; epi, li rele ak yon vwa fò, li di tout zwazo k ap vole nan mitan syèl la: Vini non; epi rasanble tèt nou ansanm pou resepsyon gran Bondye a;
18
pou nou ka manje chè wa, ak chè chèf militè, ak chè gason vanyan, ak chè cheval, ak pa sila ki monte sou yo a, ak chè tou lèzòm; alafwa sa ki lib e sa ki esklav; alafwa sa ki piti e sa ki gran.
19
Ansuit, mwen wè bèt la, ak wa sou latè yo, avèk lame yo ki te rasanble ansanm pou yo fè lagè kont Sila ki chita sou cheval la, e kont lame L la.
20
Alèkile, yo te arete bèt la, e yo te pran fo pwofèt la ki t ap fè mirak yo devan l yo; se ak sa li te twonpe moun yo ki te resevwa mak bèt la, ak sila yo ki te adore imaj li a. Toulède, yo te voye yo jete tou vivan nan yon lak dife k ap boule ak souf.
21
Epi, ti rès moun ki te rete yo, yo te mouri anba epe Sila ki chita sou cheval la; epe sa a ki lonje sot nan bouch Li a; e, tout zwazo yo plen vant yo ak chè moun sa yo.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!