Liv Apokalips
Chapit 21
Klike la pou koute lekti chapit sa1
Ansuit, mwen wè yon nouvo syèl ak yon nouvo tè; paske premye syèl la ak premye tè a te fin pase; epi, pa t gen lanmè ankò.
2
Epi, mwen menm Jan, mwen wè vil sent lan, nouvo Jerizalèm nan ki t ap desann sot kote Bondye nan syèl la, pare tankou yon lamarye ki abiye pou mari l.
3
Epi, mwen tande yon gwo vwa sot nan syèl la ki di: Men li, tabènak Bondye a avèk lèzòm; e, L ap abite ansanm avèk yo; e, se pèp pa L yo va ye; konsa, Bondye Li menm va la avèk yo, e se Li k ap Bondye yo.
4
Epi, Bondye va siye tout dlo nan je yo; e, p ap gen lanmò ankò, ni tristès, ni kriye; nonplis tou, p ap gen okenn doulè ankò; paske, bagay anvan yo fin pase ale.
5
Alò, Sila ki chita sou twòn nan di: Gade, Mwen fè tout bagay nèf! Epi, Li di m konsa: Ekri, paske pawòl sa yo vre e yo fidèl.
6
E, Li di m konsa: Se fini! Mwen se Alfa e Omega; kòmansman an ak lafen an. M ap bay moun ki swaf la nan sous dlo lavi a gratis.
7
Moun nan ki gen laviktwa a va eritye tout bagay; konsa, M ap Bondye li, e li va pitit Mwen.
8
Sepandan, kapon yo, ak enkredil, e abominab yo, ak asasen, e imoral, ak chòchye, ak idolat, ak tout mantè, yo va gen plas pa yo nan lak k ap boule ak dife e ak souf la; se sa ki dezyèm lanmò a.
9
Epi, youn nan sèt zanj yo ki te gen sèt bòl plen ak sèt dènye kalamite yo vin kote m, e li pale avè m, li di: Vin isit, mwen pral montre w lamarye a, madanm Ànyo a.
10
Alèkile, li pote m ale ann espri sou yon gwo mòn byen wo; epi, li montre m gran vil la, Jerizalèm ki sen an, ki t ap desann sot nan syèl bò kote Bondye;
11
ki te gen glwa Bondye, e limyè l te tankou yon pyè presye pi gran valè; ou ta di yon pyè jasp, klè kou kristal.
12
Epi, li te gen yon gwo miray ki wo; e li te gen douz pòtay, ak douz zanj nan pòtay yo, ak non ki te ekri sou yo; ki se non douz tribi pitit Izrayèl yo.
13
A lès, twa pòtay; o nò, twa pòtay; o sid, twa pòtay; e, a lwès, twa pòtay.
14
Ansuit, miray vil la te gen douz fondasyon; e, yo te gen non douz apot Ànyo a sou yo.
15
E, li menm ki te pale avèk mwen an te gen yon rozo ann ò pou pran mezi vil la, ak pòtay li yo, e ak miray li a.
16
Kidonk, vil la te etann sou kat bò, e longè l te egal ak lajè l; epi, li pran mezi vil la ak rozo ann ò a, se te douzmil estad. Longè, lajè, ak wotè vil la te egal.
17
Apre sa, li pran mezi miray vil la, se te sankarannkat koude; dapre mezi moun, ki te mezi zanj lan tou.
18
E, miray vil la te bati ak pyè jas; e, vil la te ann ò kalite pirifye, ou ta di vit ki byen klè.
19
E, fondasyon miray vil la te dekore ak tout kalite pyè presye. Premye fondasyon an te yon jas; dezyèm nan, yon safi; twazyèm nan, yon kalsedwàn; katryèm nan, yon emwòd;
20
senkyèm nan, yon saldonis; sizyèm nan, yon sadwàn; setyèm nan, yon krizolit; uityèm nan, yon beril; nevyèm nan, yon topaz; dizyèm nan, yon krizopaz; onzyèm nan, yon yasent; douzyèm nan, yon ametis.
21
Epi, douz pòtay yo te douz pèl; e, chak pami yo te yon grenn pèl; e, lari nan lavil la te ann ò kalite pirifye, ou ta di vit transparan.
22
Men, mwen pa t wè okenn tanp ladan l; paske, se Senyè Bondye Toupuisan an avèk Ànyo a ki tanp li.
23
Lèfini, vil la pa t bezwen solèy la, ni lalin lan, pou klere ladan l; paske, glwa Bondye te limen l; e, Ànyo a se limyè vil la.
24
Konsa, nasyon moun ki sove yo va mache nan limyè vil la; e, wa sou latè yo ap vin pote glwa ak onè nan li;
25
epi, pòtay li yo p ap janm fèmen ditou lajounen, paske pa gen lannuit la a.
26
E, yo va pote glwa ak onè nasyon yo nan li.
27
E, pa gen anyen ki sal, ni okenn sa k ap komèt abominasyon, oswa k ap bay manti, k ap janm kapab antre ladan l ditou; men, se sila yo ki te ekri nan liv lavi Ànyo a.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!