Liv Apokalips
Chapit 22
Klike la pou koute lekti chapit sa1
Apre sa, li montre m yon larivyè pirifye dlo lavi, klè tankou kristal, ki te soti nan twòn Bondye a ak Ànyo a.
2
Nan mitan lari vil la, e sou toude bò rivyè a te gen pyebwa lavi a, ki te donnen douz kalite fwi, e li te bay fwi l la chak mwa; epi, fèy pyebwa a te sèvi pou gerizon nasyon yo.
3
Konsa, p ap gen madichon ankò; men, twòn Bondye a ak Anyò a va nan vil la; e, sèvitè Li yo va osèvis Li.
4
Alò, yo va wè figi L; e, non L ap nan fwon yo.
5
E la a, p ap gen lannuit, yo p ap bezwen okenn lanp, ni limyè solèy la; paske, Senyè Bondye a bay yo limyè; e, yo va reye pou toutan e pou letènite.
6
Ansuit, li di m konsa: Sa yo, se pawòl ki fidèl e ki vre; e, Senyè Bondye pwofèt ki sen yo te voye zanj Li a montre sèvitè L yo bagay ki gen pou fèt talè konsa.
7
Gade non, M ap vin byen vit! Se yon moun beni li ye, sila ki kenbe pawòl pwofesi ki nan liv sa a.
8
E, mwen menm Jan, mwen te wè bagay sa yo, e m te tande yo. Alò, apre ke m te fin wè e m te tande yo, mwen tonbe atè pou m adore zanj ki te montre m bagay sa yo a.
9
Lè sa a, li di m konsa: Se pa bagay pou w fè; paske, se sèvitè parèy ou mwen ye, parèy ak frè w yo pwofèt yo, ansanm ak moun ki kenbe pawòl liv sa a! Se Bondye pou w adore!
10
Lèfini, li di m: Pa poze sele sou pawòl pwofesi ki nan liv sa a non; paske, tan an fin rive.
11
Moun ki enjis la, kite l ret enjis toujou; moun ki nan salte a, kite l ret nan salte a toujou; e, moun ki dwat la, kite l ret dwat toujou; epi, moun ki sen an, kite l ret sen toujou.
12
Epi, gade non; M ap vini byen vit! E, rekonpans Mwen avè M, pou Mwen bay chak moun dapre sa zèv li va ye.
13
Mwen se Alfa e Omega, kòmansman an e lafen an, premye a e dènye a.
14
Se moun ki beni yo ye, sila yo ki fè kòmandman Li yo, dekwa pou yo ka gen dwa a pyebwa lavi a, e ke yo ka pase pa pòtay yo pou antre nan vil la.
15
Paske deyò a, se chyen ki la, ak chòchye, ak imoral, ak asasen, ak idolat, ak nenpòt moun ki renmen bay e k ap bay manti.
16
Mwen menm Jezi, Mwen te voye zanj Mwen an temwaye bagay sa yo ba ou nan legliz yo. Mwen se alafwa rasin e desandan David; e, Mwen se zetwal klere granm maten an.
17
E konsa, Lespri a ak lamarye a di: Vini! Se pou moun ki tande a di: Vini! E, se pou sila ki swaf la vini. Epi, kèlkeswa moun ki vle a, kite l pran dlo lavi a gratis.
18
Paske, mwen temwaye bay tout moun ki tande pawòl pwofesi liv sa a, ke si nenpòt moun t ava ajoute sou bagay sa yo, Bondye va ajoute bay moun nan kalamite yo ki ekri nan liv la;
19
e, si nenpòt moun t ava wete nan pawòl ki nan liv pwofesi sa a, Bondye va wete pati pa moun nan te genyen nan liv lavi a, ak nan vil sent lan, ak nan bagay ki ekri nan liv sa a.
20
Sila a ki temwaye bagay sa yo di: Sètènman, M ap vin byen vit! Amèn. Se sa menm, vini, Senyè Jezi!
21
Se pou gras Senyè nou an, Jezi Kris, avèk nou tout. Amèn.
Met men avèk nou nan reyalizasyon yon tradiksyon labib ki fyab, kòrèk e solid. An nou envesti nan lavni espirityèl chak Ayisyen!
Pawòl Bondye se sèl espwa pèp Ayisyen!